Safiye Alagaş

 

AMED - Polîso bi nameyê B.K yo ke M.B îstîsmaro zayendî kerd, ame beratkerdiş. Avûkat Hatîce Demîre reaksîyon mojna beratî û dîyar kerde ke  polîsê ke Kurdistan de suc kenê bi zirxê bêcezabîyayîş yenê pawitiş û wina va: “Pêwa heme delîlan polîs ame beratkerdiş.”

 

Polîso bi nameyê B.K cinîya bi nameyê M.B ya nas kerdebî îstîsmaro zayendî ro ci kerdib û dewaya derheqê ey de amebî akerdiş, hîrên roniştişê ey 8ê Sibate de Yewin Dadgeha Cezaya Mêrdînî de amî beratkerdiş. Avûkata M.B û endama Komîsyonê Cinîyan ê Şubeyê ÎHDî yê Amedî Hatîce Demîre qerarê beratî şîrove kerde û dîyar kerde ke verê ke delîlê dosya ra biewnê no qerar ameyo dayîş û va no semed ra tu hetê huqûqî yê no qerarî çin o.

 

‘Berat nê ganî ceza bigirewtêne’

 

Hatîce ard ziwan ke qerarê ke ameyo dayîş înan matmaye nêkerdo û va sere de polîs û amîrê emniyetê Mêrdînî delîlê suc nimêtê û muracatê her rayîrî dayê, la delîl dîyar bî gerek qerarê beratî nê ceza biameyne dayîş.

 

Hatîceyê dîyar kerde ke şewe hedîse M.B bi hemkarîya embazêke xo ya cinî xo resnena polîs û va: “Dozgerîya nobedar gerek muwekîl sey mexdûr û polîs zî sey gumanbar şîrove bikerdêne. Dozgerî sûcê ‘îtreteyî’ erzena polîs cigêrayîş dana destpêkerdiş. Telefonê muwekîle bi sebebê gumanbarî yena destserkerdiş.

 

Heto bîn ra Hatîce dîyar kerde ke polîs û amîrê ey seba muwekîle mi gerre nêkero û îfadeyê xo bivurno aye tehdîd kerdê. Hatîce wexto ke M.B reya ewil muracatê dozgerî kena wazena  polîs bipawa û reya diyîn cigêrayîş dana destpêkerdiş, dozgerîye her roniştiş de waştişê tepiştişî kena la heyetê dadgehe zî her rey red kerdê.

 

Hatîce da zanayîş ke îtîrazê qerarî kerdê û muracatê Dadgeha Îstînafî bikera û rewşa qerarî xira nêbo zî do şiro dadgerîye, eke dadgerî zî rewşe xira nikero do şêrê Dadgeha Heqê Merdiman ê Ewropa.