WAN- Goristanê Xerzanî yê dewa Oleka Corî ê Bedlîsî, 19ê Kanûna 2017an de 267 cenazeyê  aîdî gerîllayê PKKî  bi sebebê 'Testê DNA'yî' amebî vetiş û eşrawitê Stenbolî. Derheqê hedîse de hetê Walîyê Bedlîsî ra îzahatêke nuşte raya pêroyîyê rê amebi parekerdiş û îzahat de vetişê cenazeyan girêdayîşê raporê otopsîyan kerdibî. En peynî Serekomarê Tirkîya Recep Tayyîp Erdoganî zî Bedlîs de kongreya partîya xo de qisey kerdib û bi vatişê 'Gelo nê goristanê sexte ça de yê?' Heqaret goristanê Xerzanî kerdib. Keyeyan reaksîyon hemverê qiseykerdişê rayedarê dewlete dayî û vatî heta ke cenazeyê xo bigîrê ê do têkoşîn bikerê.

 

Bi fermanê dozgerîya Goristanê Xerzanî yê dewa Oleka Corî yê Bedlîsî, 19ê Kanûna 2017an de 267 cenazeyê aîdê gerîlayê PKKî bê keyeyê înan ameybî vetiş û eşrawitibî Sazgehê Tibê Edlî yê Stenbolî. Bi reaksîyonê keyeyan Serdozgerîya Komara ya Bedlîsî îzahat dabî û eşkera kerdibî ke demêke nêzde cenazayan bidê keyeyan. La ti averşîyayîş nêvirazya. En peynî Walîyê Bedlîsî raya pêroyî rê bi îzahatê "Goreyê mevzûatê qanûnê yê" reaksîyon mojnabi helwestê keyeyan. Reaksîyon û bendemayîşê keyeyan dewam keno.

 

'Hêrişê serê goristanan bêrêzdarîyê hemverê dînî yo'

 

Keyeyê Hûseyîn Donero ke mîyanê 267 cenazeyande de cenazeyê ey zî amebi diznayîş, nacnîya ey Necîbe Donere qisey kerde û va ke heta ê cenazeyê xo bigîrê ê do têkoşînê xo dewam bikerê û wina va: "Hûseyîn Rojawanê bajarê Hesekî de cuya xo vinî kerd. Ma hewteyêke pey cenazeyê ey de bî. Heta ke ma cenaze girewt, ma zaf zehmetî ant. Dimayê ke ma cenaze bi raporê otopsî girewt, ma Gorîstanê Xerzanî de defin kerd. Hîrê serrî serê definkerdişê ey ra derbaz bi. La aşmê vîyarte de serê goristanê Xerzanî de girewtî û cenazeyan vetî. Cenazeyê heme merdiman ê ma berdî. Ma nika wazenê cenazeyê înan merdimanê xo bigîrê. Cenaze bi sebebê raporê otopsî nêameyê amadekerdiş vetê. La raporê otopsî estbi. Nika zî cenazeyê ma nêdanê ma. Reyan vanê Bedlîs de yê reyan zî vanê ke seba otopsî berdê Stenbol. Ma nika baş nêzanê ke cenaze berdê ça de. Ma cenazeyê merdimanê xo wazenê. Hêrişê serê goristanan nîno qebulkerdiş. Dewlete merdanê ma ra çi wazena? Heta esteyê ma zî bena. Dewlete hem saxan hem zî merdan ra tersena. Hêrişê serê goristanan bêrêzdarîyê hemverê dînî yo."

 

'Eke seba raporî bo çira cenazeyê ma nêdanê'

 

Necîbe dewamê qiseykerdişê xo de reaksîyon hemverê îzahatê  walîyê Bedlîsî da û va ke hêrişê serê goristanan bêtehemûllîyê hemverê erjê kurdan o û wina va: "Ma wazenê cenazeyê domananê xo bigîrê. Cenazeyê 267 kesî diznayî. Nika heme zî vinî yê. Tena hêrişê Goristanê Xerzanî nê hêrişê ser her goristanêke kenê. Ma sîlopî de testê DNA da. Raporê ey destê ma de yo. Eke amanc raporê otopsî bibayne gerek keyeyan rê zanayîş bidayne. Eke cenaze seba otopsî ameyî vetiş, çira bê destûrê keyeyan bi bêvengî yenê vetiş? La amanc raporê otopsî nîyo. Bi nê sebeban keyeyan rayvanî acis kenê. Pîyê Huseyînî bi çend rey şino Stenbol û yeno la bi destê ke veng yeno. Çira şima keyeyan, mayan û pîyan hende acis kenê. Ti cayêke de nimûneyê hêrişê goristanan nêmaeyo vînayîş."

 

'Ma do seba girewtişê cenazeyan têkoşîn bikerê'

 

Necibe en oeynî ard ziwan ke heta ke cenazeyê domananê xo bigîrê do têkoşîn bikerê û wina va: "Heta ke ma cenazeyê domananê xo bigîrê, ma do têkoşîn bikerê. Ma do muracatê xo zêde bikerê. Heta ke ma cenazeyê domananê xo nêgîrê, ma rê huzûr çin o."