Zeynep Durgut

 

WAN - Tirkîya de dimayê ke OHAL ame îlankerdiş ra dima bi ti hawa vernîye krîzê ekonomî nîno girewtiş. En peynî bi hêrişkerdişê Efrînî dir krîz zêde bi. Dimayê ke OHAL ame îlankerdiş bi desan esnefan berayê kargehê xo girewtî û a ke mendî zî verê îflasî de yê.

 

Tirkîya de dimayê ke OHAL ame îlankerdiş û dima ra krîzê ekonomî her roje zêde bi. No krîz ke zêde bi, bi hêrişê Tirkîya yê serê Efrîni her ke şi hîna kûr bi. Cinîyê ke her warê ekonomî de bi îmkanê en kêm debara xo kenê zî para xo nê krîzî ra girewtî. Cinîyê Esnaf derbarê krîzê ekonomî de qisey kerdî û vatî ke şerî rê esto, şarî rê çin o.

 

'Wa krîzê ekonomî bêro çareserkerdiş'

 

Cinîya bi nameyê Sîbel Zafera ke bazar de birayê xo dir bi rotişê cilan debara xo kenê wina va: "Ma her roje cayêke de bazar akenê. Ma saete 9ine de dezgehê xo akenê û heta saete 4ê şanî karê xo dewam kenê. Semedo ke zimistan o zî bi rastî ma zaf zehmetî ancenê. La pêwa ende zehmetî zî xeylê reyan ma deste veng şinê keye. Semedo ke şer esto û çinbîyayîşî şar nêwazeno çîyêk bigîro. Betalî xeylê zêde ya û ti kes nêeşkeno seba xo karêke bivîno. No zî bandure serê rotişê ma de keno. Serra şî hîna baş bi, her ke şino hal hîna xirab beno. Ma wazenê krîzê ekonomî çareser bikerê."

 

'Eke şer bêro vindertiş do problem zî çareser bo'

 

Gulîstan Moho dîyar kerde ke seba şer esto heme çî vay bîyo û şar semedo ke ameyoxê xo nêvîneno pereyê xo daranê we û wina va: "Bi çend serrî yo ez esnafî kena. Reya ewil o ke ez hende zehmetî ancena.  Seba şerî  şar bêçare mendo. Ma nêeşkenê rotiş bikerê û karê ma derbaz nêbeno. Dikanê ma hemin e vala bîyê. Eke şer bêro vindertiş û huzûr virazyo do problemî zî bêrê çareserkerdiş."

 

'Gerek Tirkîya vernê de problemê xo yê mîyanê xo çareser bikero'

 

Esnaf Gûlîstan Orhane zî ard ziwan ke şar bi vêşanî yeno terbîyekerdiş û wina va: "Ma her roje serê siba saete 8ine de kargehê xo akenê. Roje de en zêde 3 ya zî 4 girewtoxî yenê. Xeylê reyan kesê ke yenê verê înan de pere çin o. Xeylê reyan ma nişnenê ro heta şande û deste veng şinê keye. Tirkîya de her esnaf eynî problem cuyeno. Seba krîzê ekonomî çareser bibo gerek şerê welatî bêro vindertiş. Ma bi serran o aştî wazenê. Gerek Tirkîya problemê xo yê mîyanê xo çareser bikero."

 

'Dimayê OHALî rewşe xirab bî'

 

En peynî Yildiz Kormaza ke terzîxaneyê aye esto qisey kerde û wina va: "Şero ke yeno kerdiş en zaf esnafî bandure benê. Dimayê ke OHAL ameyo îlankerdiş ra dima rewşa ekonomî hîna xirab bî. Karê ma baş derbaz nêbeno. Semedo ke ameyox kifş nîyo hetêk ra bêpereyî yeno cuyayîş, hetêk ra zî kesê ke pereyê înan estê nêwazenê xerc bierê. Ez serê siba ra heta şande  kargehê xo de nişnena ro û şan de deste veng şina keye. Gerek vernê de OHAL bêro peynîkerdiş û dima ra şerê ke esto bêro vindernayîş. Ma êdî nêeşkenê debara keyyeê xo bikerê. Ma rewşake îstîsnayî dir rî bi rî yê."