Fîlîz Zeyrek

 

EDENE - Huda Kaya dîyar kerde ke Tirkîya wextê hêrişê hemverê Efrînî kena dînê îslamî xebitnena û va: "Seba saltanatê xo, merdiman qetil kenê. Do hesab senîn bidê Homa? Îslam dînê aştîye yo, lişên mekerê."

 

Hêrişê Tirkîya yê hemverê Efrînî kewt roja 20ine. Hêrişan de nika xeylê xo ci ra cinî û domanî en tay 148 sîvîlî cuya xo dayî û bi seyan sîvîlî birîndar bî. Parlamentera HDPî ya Stenbolî Huda Kaya dîyar kerde ke hukmatê AKPî dîn îstîsmar keno û va îslam dînê aştîye yo, lişên meke.

 

Huda ard ziwan ke OSO yo ke bi TSKî dir têgeyreno, DAÎŞî ra cîya nîyo û va manaya dinya şer nîyo, aştî û aramî yo.

 

'Komelî kenê hewn'

 

Huda dewam de da zanayîş ke Tirkîya rastîyan raya pêrîyî ra nimnena û wina va: "Bi çapemenîya ke girewtê de propagandayê xo kenê. Bi no hawa komelî kenê hewn. Mîyanê komelî de nefret û kîn vila kenê. Welat de çîyo en zêde ma hewceyê heqîqet o. Welat de heqîqet nêmendo. Merdimî şaşî û rastî nêzanê. Tercîhê kesan zî yenê sansurkerdiş. Şerê Efrînî de çîyo ke kenê no yo."

 

‘Kur'an de emrê wehşetî nîno dayîş'

 

Hudaye ard ziwan ke OSO sucdarî şerê mîyanneteweyî yo û komêke wehşî yo û wina va: "Nika zî sey artêşa mintiqa û neteweyî yenê îlankerdiş. Vanê înan rê dua bikerê. Seba nê çimsûran vanê suraya Fetîhî biwanê. Ez sey cinîyêke musluman vana Kur'an emrê wehşetê nêdano ma, çîyêke wina çin o! La ê kesê merdan rê û esîran rê zî zulm kenê."

 

Do senîn hesab bidê Homa?

 

Huda ard ziwan ke îşkenceyê wextê xoverdayîşê îdarekerdişê xoserî de çîyo ke cinîyan rê ameyo kerdiş, Efrîn de zî Barîn Kobane rê ameyo kerdiş û va: "Sereyê merdiman tira kenê û poz danê. Ma merdimayî ra şerm kenê. Dînê ma lişên kenê. Wexto ke nê qirkerdişan kenê, nameyê Homa vanê. Seba saltanatê xo merdiman qetil kenê. Do hesab senîn bidê Homa."