AMED - Şehmus Îlhano ke Rojbîn Barana qetil kerd û dima ra derheqê babete de rojnamegeran tehdîd kerd, ame tepiştiş. Merdimê Şehmus Îlhanî verê dadgehe de kom bî û bi vatişê ‘ma do sey vilan paşayê xo rê biewnê, hepisxaneyî kamî rê mendê?' û piştdayîş dayî Şehmus û bi nê vatişan reyke bîn zî mojna ke netîceyê polîtîkayê bêcezabîyayîş de hepisxane camêrdan rê nêmaneno.

 

Camêrdo bi nameyê Şehmus Îlhan taxa Dîcleya Fîskayayê Yenîşehîrê Amedî, 24ê Kanûna 2017an de cinîya bi nameyê Rojbîn Barane qetil kerd û dima ra zî rojnamegerê ke şîbî cayê hedîse tehdîd kerdib. Şehmus 40 rojî dimayê kiştişî ame tepiştiş û wexto ke roportaj dabi rojnamegerê ma zî vatibî do ceza nêgîro.

 

Cesaret kamî ra gêno?

 

Şehmuso ke 40 rojî xo nimna, bê guman cesaret keyeyê xo û polîtîkayê dewlete ê bêceza ra gêno.

 

Wexto ke Şehmus Îlhanî benê edlîye, merdimêke ey va, ‘wa sereyê to berz bo. Ma do sey vilan paşayê xo biewnê. Hepisxane karê ma yo'. Wexto ke merdim piştdayîşê keyeyî û vatişê ‘hepisxane karê ma yo' ewnîyenê, reyke bîn zî yeno vînayîş ke qanûnî nê cesaretî danê.

 

Hepisxane camêrdan rê nêmaneno!

 

Gelo bi rastî zî hepisxane kamî rê mendo? Cinî hetê mêrde, pî, bira, heskerdox û camêrdê ke nas nêkenê ra yenê qetilkerdiş. Kiştoxê cinîyan bi sayeyê tehrîkê bêheq û kewtişê helwestê rêzdar bi bêcezabîyayîş yenê xelatkerdiş. Belkî hepisxane nê camêrdan rê nêmaneno. La hepisxane bi cinîyê ke pawitişê cewherî kenê pir beno.