WAN - Komiro ke hetê Mudurîyê Hetkarîyê Komelî yê Wanî ra yeno vila kerdiş, jehr vila keno. Pêwa weşîya merdiman tehdît keno zî vilakerdişê komirî dewam keno. Hanîfe Irmaka ke mecbura no komirî bixebitno va ke: "Ez borîyê soba aşma ra en tay çar rey pak kena. La ma hema zî binê boya komirî de cuyenê. Nîmeyê komirê ke yeno vilakerrdiş kerra yo."

 

Mintiqaya Serhedî hetê Mudurîya Hetkarîya Komelî ra seba keyeyê feqîran komir yeno vilakerdiş û komir yeno vilakerdiş zî jehr vila keno. Seba jehrê soba merdiş û birîndar zî virazênê û her serre bi seyan kes no semed ra nêweş benê û bi desan kesî zî seba gazê karbonmonooksîtî cuya xo vinî kenê.

 

Pêwa îqazkerdişê ke zirar dano weşya şarî, hemwelatî mecbur manenê komir xebitnenê. Hemwelatîyan reaksîyon hemverê nê çî danê. Hanîfe Irmaka ke taxa Yalimereza taxa Îpekyolî Wanî de cuyena, dîyar kerde ke hema hema her hewte tozê komirî pak kena.

 

Aşma çar rey borîyan pak kena

 

Hanîfe dîyar kena ke bi firçeyêke plastîk borîyê soba pak kena û va komiro ke yeno vilakerdiş zî kerra yo. Hanîfe wina va: "Aşma ra en tay çar rey borîyan pak kenê. Seranserê zimistanî dês û perdeyê ma benê komir.  Qaşo seba hetkarî danê ma. La ma cinî reyna lişînêyê înan pak kenê."