EFRÎN - Îdarekara TEVDEMî ra Berîvan Zîlane dîyar kerde ke Efrîn de xoverdayîşêke pîl yeno cuyayîş û va: "Ma do faşîzmê AKPî birijnê. Ma do bibê boya şarê Tirkîya ê ke binê teda de yê. Gerek şarê Tirkîya veng bidê nê xoverdayîşan. Pêwa hêrişan moralê şarê Efrînî berz o. Şar binê topan de dewan de xo ver danê. Warê xo trek nêkenê. Heta ke yew Efrînij bimano ma do xo ver bidê.

 

Îdarekara Tevgerê Komelê Demokratîk (TEVDEM) Berîvan Zîlane, hêrişê Tirkîya ê hemverê Efrînî şîrove kerde û dîyar kerde ke hêrişê ke kewtê roja 19ine roj bi roje zêde benê û wina va: "Roj bi roje pêrodayîş xidar benê. Rojê peyînan de leşker û çeteyê DAIŞî darbeyê pîl hêzê QSDî ra girewtî. Hûmara leşker û OSOyan ke pêrodayîşan de cuya xo vinî kerdê zêde yê. Çapemenîya Tirkan rastîyan nimnena. Raya pêroyî ra nimnena."

 

Pêwa teknolojîya giran…

 

Berîvane ard ziwan ke şer bi teknolojîyê giran yeno kerdiş û wina va: "Tirkîya bi heme teknolojîya destê xo hêriş kena. Heme cepheyan de pêrodayîş yeno cuyayîş, xoverdayîşêke pîl yeno mojnarayîş. Hemverê heme îmkanê leşkerî û teknîkî xoverdyaîşêke pîl yeno mojnarayîş."

 

'Şar bi moral o'

 

Berîvane dewam de ard ziwan ke şarê Efrînî xeylê bi moral û hêzdar ê û wina va: "Şarê ma, îdarekarê ma, cinî, ciwan û domanî mîyanê vindertişêke xurt de yê. Beşdarbîyayîşê şarî zaf baş o. Şar qeza û dewan de xo ver danê. Warê xo trek nêkenê. Bedelê giranan danê."

 

Seba şarê Tirkîya vengdayîş

 

Berîvane da zanayîş ke hemverê nê çî îrade û ruhê xoverdayîşî do AKP û çeteyê DAIŞî netîce nêgirê û va ke ganî şarê Tirkîya ê bindestî bibê boye û veng da ke ganî şarê Tirkîya veng bidê nê xoverdayîşî. Berîvane peynîye qiseykerdişê xo de va, heta ke Efrînijêke bimano ê do xo ver bidê û va do hemverê faşîzmî vinî nêkerê.