ŞEHBA - Cinîyê Tirkmenî ke vernê de vera zulmê DAÎŞî û dima ra zî vera hêrişê Tirkîya mecbur mendî dewa xo ra vejyê û dîyar kerdî ke wa Erdogan nameyê înan nêdo serê ziwanê xo û vatî ke Tirkmenî ey nêwazenê.

 

Roja ke krîzê Sûrîye dest pêkerdo heta nika hetê Tirkîya ra, Tirkmenî sey argumanê polîtîk yenê xebitnayîş û Tirkmenî vernê de rastê hêrişê DAÎŞî û nika zî şahidîyê hêrişê Tirkîya kenê. Tirkmenî dimayê hêrişan şî  Kantonê Şehba ke QSD asayîşê ci gêno.

 

Cinîyê Tirkmenî ke seba reyke bîn cayê xo ra nêbê, doman, mêrde û merdimê înan hêzê pawitişê Federasyonê Vakurê Sûrîye de ca gênê, dîyar kerdî ke ê bi fikrê cuya pîya bawer ê û no semed ra bawer ê ke do ameyoxê şaran pîya bêro awankerdiş.

 

'Destê ey de gonîya domanan esto'

 

Yew înan ra Halîme Hiseyna ke ewil hêrişê DAÎŞî û dima ra zî hêrişê Tirkîya ra Çobanbeylî ra vejyaya û Şehba de cuyena. Halîme wina va: " Ez Çobanbeylî ra yena. Ez Tirkmen a. Ez tîya ameya dinya û tîya pîl bîya. Ma zulmê  Erdoganî ra remayî û ameyî mintiqaya Şehba. Danê domananê ma ro. Vanê ‘ma nêdanê sîvîlan ro, ma danê leşkeran ro' La şar tîya de yo. Danê mektebanê ma ro. Efrîn de danê domanan ro. Destê ey de gonîya domanan esto."

 

Zelha El Maha ke El Bab ra remaya û ameya Şehba, dîyar kerde ke aye Tirkmen a û wina va: "Ma Bab de cuyayne. Vernê de DAÎŞ ame. Dima ra leşkerê Erdoganî ameyî. Ma ganê xo bi zor xelisna. Nika zî danê tîya ro. Domanan kişenê. Wa heme kes bieşnawê. Efrîn de, Şehba de domanî mirenê. Wa Erdogan nameyê ma nêdo serê ziwanê xo. Ma Tirkmenî ey nêwazenê."

 

Cinîya bi nameyê Heyrîye Hesene ke 5 serrî verê seba hêrişê DAÎŞî bi domananê xo dir Raî ra rema û amî Şehba nê çî vatî: "Ma dewa xo ra seba DAÎŞî remayî. Nika çeteyê Erdoganî danê ma ro. Erdogan seba  Esad vano ke ‘kiştoxê domanan o'. Sûrîye berd welatê xo. Dima ra dês da ro. Nika o bi xo domanê Sûrîye bombarduman keno. Çeteyan eşrawenê serê ma de. Sîvîlan kişenê. Wa her kes bivîno. Şarê Sûrîye do her tewir, hemverê hêrişan xo ver bidê. Sey Kobanî bajarê ma serûbin bibê zî, ma do cayê xo nêdê înan. Domanê ma do ma bipawê."