Ferîde Zede-Lîlav Elî

 

EFRÎN - Cinîyê  Êzidî yê Mintiqaya Efrînî hêrişê dewleta tirkî yê serê mintiqaya  Efrînê û qezayê ey şermezar kerdî û veng dayî ke dewleta tirkî peynîye hêrişan bîyarê.

 

Cinîyê Êzidî yê mintiqaya Efrînî hêrişê dewleta Tirkî yê ser herra Efrînî û heme qezayê aye şermezar kerdî û reaksîyon hemverê bêvengîya hêzê mîyanneteweyî vera nê hêrişan dayî. Cinîyan veng da Tirkîya ke hêrişê serê sivîlê Efrînî vindarnê.

 

Koordînatora Yewîya Cinîyê Êzidî Rehîme Dedo hêrişê dewleta tirkî şermezar kerde û wina va: "Sûrîya ke heme tewir şarî mîyanê xo de hewênena, ewro hetê dewleta tirkî ra yena bombardumankerdiş.  Tarîxî ra zî kifş o, kurdî terorîst nîyê.  Çeteyê DAÎŞî û dewleta tirkî ke nameyê muslumanî dayê xo wa, bi hemkarî tebaxa 2014an de Şengal de bi hezaran domanî qetil kerdî û îşkence cinîyan kerdî. Ma cinîyê êzidî ke hetê hêzê YPG/YPJî ra destê DAÎŞî ra ameyî xelaskerdiş, ma ewro mintiqaya Efrînî de soz danê şerwanê YPG/YPJî ke heta peynî ma do kîşte înan de bê û nêverdê ke dewleta tirkî derbazê mintiqaya Efrînî bibê."

 

'Do Erdogan nêeşko Efrîn îşgal bikero'

 

Endama Koordînasyona Yewîya Cinîyê Êzidî Gulê Zên El-Dîne zî hêriş şermezar kerd û wina va: "Heta ke fikr û felsefeyê Rayberê şarê Abdullah Ocalanî mîyanê komelî de bo, do Erdogan qetî nêeşko bostêke herra Efrînî îşgal bikero. Ez veng dana rêxistinê heqê merdiman ke hêrişan vindarnê. Heta ke nê hêrişî dewam bikerê do heme caameyê Efrînî zî dest bidê yewbînan û hemverê îşgalkerdişê dewleta tirkî vinderê û têkoşînê xo dewam bikerê."

 

'Hêzê mîyanneteweyî bêveng ê'

 

Endama Têkilîyê Yewîya Cinîyê Êzidî Gulê Cafere zî têkildayîşê hêrişê ser Efrînî wina va: "Dimayê ke dewleta tirkî û çeteyê DAÎŞî hemverê xoverdayîşê Hêzê Sûrîya Demokratîk (QSD) Reqa, Minbic û Kobanî de têk şibi, ewro reyke bîn zî dewleta tirkî bi hetkarîya hêzê mîyanneteweyî bi heme çekê xo yê giran û teyareyan hêrişê şarê sivîlî ke mintiqaya Efrînî de cuyenê, kena.  Dewleta tirkan vana ke 'ez musulman a, wehşetê xo ser cenazeyê Şehîd Barîn Kobanî de reyke bîn zî mojna ra."

 

'Ma piştdayîşê YPG/YPJî yê'

 

Gulê Cafere dewam de wina va: "Senîn ke çeteyê DAÎŞî 2014an de Şengal de qirkerdiş serê sivîlan de kerd, ewro dewleta tirkî zî Efrîn de eynî qirkerdişan kenê û wazenê îradeyê şarê Efrînî bişiknê. Labelê ma sey cinîyê Êzidî mintiqaya  Efrînî de ma piştdayîş danê hêzê  YPG-YPJî û ma nêverdenê ke herra Efrînî bêro îşgalkerdiş."