AMED - 14 rojî yo bînaya HDPî yê bajarê Amedî binê abluqaya polîsan de ya. Îdarekara bajarî Memdûhe Bîçere derheqê abluqa de va ke,  "abluqakerdişê bînaya partîyake sîyasî nîno qebulkerdiş."

 

21 Çele de seba hêrişê Tirkîya serê Efrînî protesto bikerê bînaya HDPî ya Bajarê Amedî hetê polîsan ra amebî astengkerdiş û bîna kerdibî binê abluqa. Memduhe Bîçere reaksîyon hemverê abluqakerdişê bîna da û va ke hemverê polîtîkayê winasî game xo do peyser nêerzê.

 

'Tehemulê înan îzahatê çapemenî rê zî çin o'

 

Memdûhe derheqê babete de ard ziwan ke bînaya înan ameya 'îşgalkerdiş' û va ke wexto ke derg o binê versîyê polîsan de konê ci û vejênê û wina va, "Ma her tewir de wazenê bikerê binê teda û astengîyan vejê. Îzahatê çapemenîyêke rê zî tehemulê înan çin o. Ma hema zî manayêke nêda ci. Abluqakerdişê bînaya partîyêke sîyasî nîna qebulkerdiş."

 

'Teda bibê zî kongre do bivirazîyo!'

 

Memdûhe va ke, hêrişê winasî verê kongreya HDPî ke do 11 Sibate de virazyo tesaduf nîyo û sey cinîyê ke do hemverê teda û polîtkayê pelçiqnayîşî rê sere nêdê ro.

 

Memduhe peynîye qiseykerdişê xo de wina va, "Verê ma senîn têkoşîn kerdo, ma do reyna zî wina têkoşîn bikerê. Ma hêzê xo têkoşînê cinîyan ra, tarîxê xo ra û HDPî ra ma gênê. Pêwa heme hêriş û tedayan ma heme cinîyan dawetê kongreya HDPî kenê û ma vanê wayîrê kongreya HDPî vejîyê."