MÊRDÎN - Nisêbîno ke yew ci ra en zaf bandure OHALî yeno hîskerdiş, hewteyê peyîn de polîsan bi sebebê ‘asayîşê' şarî kerdî binê kontrol. Bi kontrolê kêfî yê GBTî rê nêverdenê şar merkez de bigeyro û bi îxbarê bê bingeh erzenê serê keyeyan.

 

Qezaya Nisêbînî yê Mêrdînî hewteyê peyînan de hêrişê hemverê şarî vejya merhelaya en cor. Midûrîyetê Polîsan ê qeza ‘alarmo sûr’ qeza de îlan kerd û nê rojan de sûke de hema hema her kes binê GBTî ra yenê derbazkerdiş. Qeza de îxbarê bê bingeh zêde bî û kesê derheqê înan de cigêrayîş ameyo destpêkerdiş û dewayê înan estê, bi sebebê gerek îmza bierzê vendenê qerekolan.

 

Keyan de kesê ke 'tepişnaye' yê geyrenê!

 

Qeza de hewteyêke de eştî serê 4 keyan û vejya meydan ke xora kesê ke nika hepisxane de yê geyrenê. Eştişê serê taxê Firat û Dîcle de hîrê kesê ke nika tepisnayeyê, persayê û keyan de cigêrayîş kerdê.

 

Dekewtiş û vetişê Nisêbîn de kulubeyê newe yê polîsan ameyî awankerdiş. Heto bîn ra zî taxe de qerekol esta û kuçeyan de xeylê wesayîtê zirxî geyrenê.

 

Dimayê ke qayûm tayînê şaredarî bi ra dima kargerîyê parkê Demokrasî zî dayê kesê ke nêzdîyê AKPî yê û ame vatiş ke kesê yenê tîya îxbarê polîsan kenê.

 

'Serra peyîn de teda zêde bî'

 

Hemwelatîyêke bi nameyê Î. tepiştişê qeza rê şahidî kerdo/a dîyar kerd/e ke 15 polîsan dorê ciwanêke girewtê û nasname ci ra waştê û va: "Ti do bivînê, ma do to hal ra bikerê'. Polîsan hêrişê domanî kerdî. Qîrnayîşê ciwanî hema zî goşê mi de yo. Kesê ke reaksîyon mojnayî ra zî bi sîlehan ameyî tehdîdkerdiş. Serra peyîn de teda û zulm zêde bîyê."