Gulîstan Azak

 

XARPÊT - Hepisxaneyê Hûmara 1 ê Xarpêtî ke caardişê kêfî merhelaya en cor de yenê kerdiş, na rey zî vera keyeyê ke şinê pêvînayîş ameyî kerdiş. Merdimê hepsîyan dîyar kerdî ke hetê gardîyanna ra rastê cigêrayîşê viran û  tacîzê zayendî ameyê.

 

Dimayê OHALî tedayê ser hepsîyan de roj bi roje zêde benê. Hepisxaneyê Hûmara 1 ê Xarpêtî de îdareyê hepisxaneyî hepsîyan ser nasname ferz kenê, hepsîyê ke xo ver danê rastê caardişê kêfî yenê. Rojnameyan nêdanê hepsîyan, aktîvîteyê komelî betal kenê, bi aşman dima hepsîyan vejenê revîr. Heto bîn ra zî merdimê hepsîyan zî hetê gardîyanan ra rastê tacîzê zayendî yenê.

 

'Keyeyî yenê cezakerdiş' 

 

Merdimê hepsîyan ardî ziwan ke hepisxaneyê Hûmara 1 ê Xarpêtî de rastê hêrişan yenê û wina vatî: "Ma vetiş û dekewtişê hepisxanî de rastê tacîzê vatişî yenê. Cinîyan taybetî danê nêzdîyê kabînê camêrdan û hepsê çiman de manenê. Nuqtaya cigêrayîşî de gardîyanî seba cinîyan vanê 'vetiş de şima qehweyêke nêşimnenê'. Pêwa ke ma hedîseyê tacîzî vanê zî vanê, 'gardîyanê ma çîyêk winî nêkenê, şima winî fam kenê'."

 

'Wazenê îrade bişiknê'

 

Merdimê hepsîyan dewamê qiseykerdişê xo de dayî zanayîş ke cigêrayîşê viran de bi taybetî hewl danê ke sîstematîk bikerê û va no zî taybet seba şiknayîşê îrade yeno kerdiş. Keyeyan ard ziwan ke hemverê caardişê cilê yew tîpî vejênê zî rastê cezayê hucre yenê û hewl danê ke têkilîyê hepsîyan teber dir qut bikerê.