ÎZMÎR- Avûkata Platformê Ma do Kiştişê Cinîyan Vindarnê Çagla Denîze dîyar kerde ke eke ewro hende îstîsmarê domanan ameyo cuyayîş ganî Wezaretê Polîtîkayê Komelî û Keyeyî xo ra pers bikero.

Vejyabi meydan ke Nêweşxaneyê Cigêrayîş û Perwerdeyê Kanûnî Sultan Suleymanî yê Stenbolî qeydê 115 domanê ke netîceyê îstîsmaro zayendî de diganî mendê, yewîneyê edlî rê resnayê û Îclal N. ya ke hedîse vete meydan, nêweşxane ra amî surgunkerdiş. Netîceyê tedayê cinîyan de Serdozgerîya Komara ya Kuçukçekmeceyî cigêrayîş da destpêkerdiş û îfadeyê domanê ke 15 serre yê bêro girewtiş.

Avûkata Platformê Ma do Kiştişê Cinîyan Vindernê ê Îzmîrî Çagla Denîze dîyar kerde ke ganî derheqê kes û sazgehê ke nê sûcê îstîsmarî nimtê de cigêrayîşêke bêdê destpêkerdiş û va: "Ganî kesê ke ê domanan ardê uca zî bêrê cigêrayîş. Kesê ke domanan îstîsmar kerdê ya zî nê çîyan rê zemîn amade kerdê zî bêrê vînayîş."

‘Ganî travma nêro zêdekerdiş'

Çagla da zanayîş ke cezayê berz nînê dayîş, sûcdarî cesaret gênê û wina dewam kerde: "Wina sey hedîseyê edlî nêzdî benê û no zî zaf bi problem o. Seba tarvamayê mexduran nêrê zêdekerdiş, ganî şêrê verê pisporan. Ganî mexdur bi pedagogan bêrê goşdarkerdiş û Merkezê Taqîbkerdişê Domanan (ÇÎM) xeylê bajaran de bêrê zêdekerdiş. Verê ke hedîse bêrê cuyayîş, ganî çareserî bêrê vînayîş."