ÎZMÎR\AMED-Hemsereka HDPî ya Îzmîrî Semra Uzunoke dîyar kerde ke AKP rewşa xo ya xetere bi hêrişê ser ê Efrînî wazena bigîro û va ke hêrişê hemverê Efrînî seba şiknayîşê bawerîya şarî ya hemverê sîyasetê demokratîkî yo.

Hêrişê TSK û OSOyî hemverê Efrînî kewt roja 7ine. Zefê xo sivîl bi pêroyî de 35 kes merdî. Hemsereka HDPî ya Îzmîrî Semra Uzunoke ard ziwan ke Erdogan wazeno bi hêrişan krîz serê xo ra bierzo û va HDP zî tede wazenê xeylê sazgehan bikerê binê abluqa.

Semra va ke ê sey HDPe do warê xo yê sîyasetê demokratîk her wext bixebitnê û wina va: "Şarê Efrînî esasê aştî, birayîye de îdarekerdişê xo awan kerdê. Asayîşê Tirkîya  tehdîd nêkeno. Do domanê keyeyê feqîran bimrê û bêrê Tirkîya û provayê şerê mîyanxo bêro kerdiş. Ma sey HDPî vanê ke nê hêrişî bêrê vindarnayîş. Ma hemine dawetê vengê xo kenê."

Temsîlkara Hemsereka DBPî Hacer Ozdemîre zî ard ziwan ke hemverê şaran şerêke topyekun ameyo îlankerdiş û wina va: "AKP, MHP, CHP û Îyî Partî ke qetî nêbî yew, wexto ke babete bena Kurd benê aktorê şer î. Hêrişê Efrînî newe nîyê. Wextê Kerkukî de zî Tirkîya, Îran û Iraq hempar têgeyrayî. Hemverê Kurdan pîya têgeyrenê."

‘Sîstemê Rojawanî ra tersenê'

Hatîce peynîye qiseykerdişê xo de da zanayîş ke awanîyê HDP û DBPî yenê îşgalkerdiş û va nika Tirkîya û Vakurê Efrînî sebeb yenê mojnarayîş û merdimî yenê binpêkerdiş û nê zî Rojawanî hedef gênê û tersê hemverê sîstemê Rojawanî mojneno ra.