ENQERE-  Endama ESPî û gazîya Pirsûsî Tulîn Gure ke ewil bi înfaz amî tehdîtkerdiş û dima ra keyeyê aye kesê nêdîyaran ra ame dorpêçkerdiş û dîyar kerde ke sazbîyayîşê paramîlîter bi dewlete dir xebityenê, hemverê înan polîtîkayêke taybet bicaanê û va hemverê tehdîdê mergî û remnayîş sere nêtewênenê.

Enqere de serra peyînan de Tîmê Asayîşê Cemawerî (KGT) kesê sosyalîst û şorişgêran remnenê û tehdîd kenê. En peynî endama SGDFî Hasret Korucu Kizilay ra remnayî û îşkence bi ci kerdî. Vera Hasrete zî, endama Yewîya Wendekarê Lîseya Nebahat Aleyna Sert û endama Dev-Lîsî Turku Yilmaz ameybî remnayîş û tehdîdkerdiş. Endamê ESP  û SGDFî Sedat Polat, Tulîn Gur û Burcu Durake zî şewe vîyarte de hetê kesê nasnameyê înan nêdîyar de bi merdiş ameyî tehdîtkerdiş. Goreyê zanayîşê ke sosyalîstan dayo, ê kesan keyeyê Sedat geyrayê û vatê: "Ma do operasyonê keyeyê şima bikerê. Ma do her kesî keye de qetil bikerê. Lajê xo xelas bikere." Endama ESPî Tulîn Gure çîyê ke a şewe cuyaya qalî kerde.

'Keyeyê mi tehdît kerdî'

Tulîne ard ziwan ke dimayê operasyonê hewteyê vîyarte de hemverê ESPî dima ra yew bi yew keyeyê înan geyrayê û va: "Keyeyê mi geyrayê û vatê ma do kênaya şima bikşê û şima do nêeşkê cenaza aye zî bigîrê. Dimayê geyrayîşî ra dima şewêke bîn zî telefonê pîyê Sedat zî kenê. eynî tewir tehdît kenê. Polîsêke bi nameyê Mehmet xo dano naskerdiş zî vato ‘Lajê xo keye ra veje. Babetêke pîl esta. Ma do operasyon bikerê. Ti nevejê, ma do lajê to sey ê bînan bikişê" vatî.

Tulîne da zanayîş ke dimayê qiseykerdişî paca ra ewnîyayê û wina va: "Verê bera de kesêke estbi. Dima ra  wesayîtêke amî. Komêke qerebalix wesayît ra peya bî û înan dir pêvînayîş kerdî. 5 deqe ra dima wesayîtêke bîn amî, pîya pêvînayîş kerdî û vinderyî. Senîn dî ma paca ra înan rê ewnîyenê, destê xo ma rê leqnayî. Ma telefonê embazê xo  kerd. Ma eşrawitî qerekole. Wesayîtê polîsan amî verê bera. Polîsan înan dir pêvînayîş kerd. 10 deqe ra heme vila bî. La polîsan çîyêke nêkerd. Embaz û HDPîyijan ma uca ra vetî."

'Seba ke ma şahidê qirkerdişê Pirsûsî yê'

Tulîne da zanayîş ke nê tehdîd û hêrişê hemverê ESPî  plan kerdê û va ê nê kesan Pirsûs, Enqere û Amed ra nas kenê û va nê hêzê paramîlîter yê bi dewlete dir hemkarî kenê yê. Tulîne dewam de dîyar kerde ke verê qirkerdişê Pirsûsî hedîseyê bi nê rengî cuyayê û va seba şahidê qirkerdişî bîyê wazenê înan bitersnê.

Tulîne peynîye qiseykerdişê xo de da zanayîş ke ê do hemverê nê hêrişan sereyê xo nêtewênê.