AMED - Dayikê Aştîye yê Amedî reaksîyon nawitî operasyonê Efrînî û vatî: “Hedefê Erdoganî çinkerdişê kurdan o. Labelê her reya ke hêriş keno, dest veng agêreno. Nimûneya tewr baş zî xoverdayişê Kobanî ya. Efrîn do bibo sey Kobanê û serkewte bibo”

 

Hêriş û operasyonê dewleta tirkî yê vera Efrînî roja 6. de dewam kenî.  Netîceyê hêrişan de bi desan sivîlî ameyî qetilkerdiş û bi desan zî birîndar bîyî. Vera nê hêrişan de xeylê bajaranê Tirkîya û Ewropa de çalakîyê şermizarkerdişî yenê viraştiş. Îna ra yew zî Dayikê Aştîye yê Amedî yî. Babete ser o Dayikê Aştîye yê Amedî qisey kerdî û reaksîyon nawitî operasyonê Efrînî. Dayikê Aştîye dîyar kerdî ke Efrîn zî do bibo sey Kobanê û serkewte bibo.

 

Dayikanê Amedî ra Rahîme Çelîke qiseykerdişê xo de va ‘Hedefê Erdoganî çinkerdişê kurdan o, Erdogan her ke hêriş keno, destveng agêreno’ û wina dewam kerde: “Efrîn do sey Kobanê serkewte bibo. Şerê Efrînî nîno qebulkerdiş. Erdogan çinkerdişê heme kurdan hedef keno û îqtîdarê xo awan keno. Cok ra Efrînî de şer dayo destpêkerdiş. Şarê kurdî qet nêqedîyeno. Kurdî do hîna zêde hêz bibî û Efrînî nêverdî Erdoganî ro. Ma veng danê heme kurdan ke wa Efrînî tena nêverdî. Erdogan wazeno ma biterso.”

 

'Çina destê ma ra bêro ma do bikerî'

 

Dayîka Aştîye Elmas Ateşe dîyar kerde ke îqtîdarê AKPyî bi serran o ke vera kurdan de şer dayo destpêkerdiş û wina va: “ Wa îqtîdarê AKPyî baş bizano ke ma nêqedîyenê. Vera hêriş û operasyonê Efrînî de çina destê ma ra bêro ma do bikerî. Ganî heme şarê kurdî reaksîyon binawnî hêrişan. Eke ma vengê xo nêkerî beno ke çîyê xirab bibî. Qey sewbîna cayêk de şer çin o? Rojhêlato Mîyanênî gola gonî ya.”

 

'Efrîn zî do bibo sey Kobanê'

 

Dayika Aştîye Selma Polate zî înan arde ziwan ser: “Şerê vera kurdan de îmhakerdişê kurdan yeno waştiş. 3-4 serrî verê cu eynî rewşe Kobanê de zî bî. Dewleta tirkî ewja de vînî kerde. Erdogan vatêne do Kobanê têk şêro. Labelê Kobanê ser kewt. Efrîn zî do bibo sey Kobanê. Êdî wa şer biqedîyo. Ma nêwazenê ke cenaze ma ser de bêrî. Kesê ke xo rê vanê ma merdimî, wa reaksîyon binawnî operasyonê Efrînî.”

 

'Rojawanî de bedêlê giranî ameyî dayiş'

 

Dayika Raîfe Ozbeye qiseykerdişê xo de veng daye dinya û wina va: “Wa kesêk kayê ker û lalan kayî nêkerî û çimanê xo raştîyan rê nêgirî. Sucê kurdan çina yo? Bi sedan xort û ciwanê şarê kurdî seba pawitişê erdê xo canê xo feda kerdî. Rojawanî de bedêlê giranî ameyî dayiş. Tirkîya bi piştîya Rûsya û Amerîkayî hêrişê Efrînî kena. Kurdê ke piştî danê AKPyî, wa dest bidî wijdanê xo ser û wayirê Efrînî bivejîyî.”

 

'Kobanê sere wedarna, Erdogan kewt'

 

Tewr peynî Dayika Hesîne Gulere qisey kerde û wina va: “Vera Efrînî de şer yeno meşnayiş û netîceyê şerî de heta nika xeylê kesî cuya xo vînî kerdî. Bawerî û wijdanê ma na rewşe webul nêkena. Labelê yê Erdoganî qebul keno. Erdigan şarê kurdî ra çina wazeno? Erdogan şarê kurdî ser de şer û polîtîkayêko lîşin dano meşnayiş. Hedefê Erdoganî hertim veng vejîyenê. Şarê kurdî destûr nêdano ke Erdogan bireso hedefanê xo. Kobanê sere wedarna, Erdogan kewt.”