Nêweşxaneyê Cigêrayîş û Perwerdeyê Kanûnî Sultan Suleymanê Kuçukçekmece yê Stenbolî de vejya meydan ke 5 aşman de 115 domanî netîceyê îstîsmaro zayendî de digane mendê muracatê înan bîyê û îdarekarê nêweşxane û walitî hewl dayî ke hedîse binimnê. Cinîyan na hedîse şermezar kerdî. Cinîya bi nameyê Îclal N. ya ke wezîfedara nêweşxane bî û hedîse vete meydan, dîyar kerde ke seba domanan muracatê heme cayan kerda la no semed ra di rey ameya surgunkerdiş.

 

Netîceyê reaksîyonê de Serdozgerîya Komara Kuçukçekmece dîyar kerde ke do îfadeyê domanê ke emrê înan binê 15yî de yê do bigîra.

 

Aktîvîsta VAKADî ke bi KHKa amî padayîş, Songul Denîze reaksîyon hemverê nimtişê hedîse da û wina va: "Nêweşxane mecbur ê zanayîşê domanê ke diganeyê bidê polîsan. Xeylê hediseyê îstîsmarî ke nêkewtê binê qeydan estê."

 

'No şerm o'

 

Songule ard ziwan ke zêdebîyayîşê sûcê îstîsmarî girêdayê vatişê dîyanet û îqtîdarîyê û  wina va: "Meşrukerdişê îstîsmarî no suc zêde kerd. Personelê ke îstîsmar vejê meydan yenê surgunkerdiş. Seba vetişê îstîsmarî dewlete tersneno. Qeydê nêweşxaneyê Kanûnî Sultan Suleyman ‘lîsteya şermî’ ya. Bi taybet demê peyînan de domanê Surîye yenê îstîsmarkerdiş. Şer ra remenê, kampan de rastê îstîsmarî yenê. No zî şerm o."

 

Songule kesê ke reaksîyon hemverê îstîsmarî nêdanê zî şermezar kerdî û qiseykerdişê xo wina dewam kerde: "Wa dîyanet destê xo domananê ma ra bianco. Vatişê înan îstîsmar meşrû keno. Eke cezaya giran biameyne dayîş, ewro lîsteya ke wina çinbibayne."