STENBOL – Zeynep Calihana ke di kênayê aye zindan de yî, vera ferzkerdişê kincê yew tîpî de vengê ‘yewî’ daye keyeyan û dîyar kerde ke do  piştî bida xoverdayiş û têkoşînê zindanan û wina va: “Ez nêwazena domanê mi kincê yew tîpî xora bidî.

Kincê yew tîpî ver her ke şono reaksîyonî zêde benî. Kincê yew tîpî ke bi Qerarnameyê Hukmê Qanûnî de (KHK) yê hûmara 696î erzîyaye fealîyet kerdişanê 12ê Êlule ano vîra merdimî. Hepsîyan ser de ferzkerdişê kincê yew tîpî do bikewo merheleyêka muhîm. Hepsîyî dîyar kerdî ke do aşmêr nêvejîyî pêvînayişan. Babete ser o Zeynep Calihana ke di kênayê aye zindan de yî qisey kerde û dîyar kerde ke do vera ferzkerdişê kincê yew tîpî de xover bidî.

Zeynepe dewamê qiseykerdişê xo de dîyar kerde ke şîya pêvînayişê kênaya xo ya Zindanê Şakranî û wina va: “Kênaya mi vera ferzkerdişê kincê yew tîpî de kewtebî nobete. Hepsîyî vera ferzkerdişê kincê yew tîpî de nêrazîbîyayişê xo ardî ziwan ser. Vindetişê kênaya mi û yê heme hepsîyan seysewbînan o. Kênaya mi rê va ‘Ma do teqez kincanê yew tîpî xora nêdî û xover bidî. Bedêl çîna beno wa bibo ma do xover bidî.’ Ez ferzkerdişê kincê yew tîpî qebul nêkena.”

Zeynepe qiseykerdişê xo yê peyêna de bale ante têkoşîn û xoverdayişî ser û wina va: “Heta peynî ma do xover bidî. Ma rewşa hepsîyan ra bi şikin î. Îşkence û muameleyê nêbaş hepsîyan ser de yenê kerdiş. Ma rehet nîyî û ez nêeşkena rakewa. Na rewşe ferzkerdişê polîtîkayê teslîmgirewtişî ya. Îqtîdar vîşêrê xo reng, veng û vatiş nêwazeno. Ganî ma wayirê domananê xo bivejîyî.”