Medîne Mamedoglu

 

MÊRDÎN - Vesîle Yuksela ke parekerdişê aye medyaya komelî ser sebeb ameyî mojnarayîş, amî tepiştiş û dima ra amî tehlîyekerdiş. Serrêke û 10 aşmî cezaya aye amî tesdîqkerdiş. Vesîle bi domana xo ya Arîna 3 serrî û Avestaya 5 serrî eşrawitî hepisxane.

 

Mêrsîn de serra vîyarte de aşma sibate de cinîya bi nameyê Vesîle Yuksea ke seba parekerdişê hesabê medyaya komelî de ‘propagandaya rêxistine kerdiş' ra amî tepiştiş û dima ra vetî dadgehe. Dadgehe persa ‘PKK rêxistine terorî ya’ persa û Vesîle cewabê ‘Nê’ da û amî tepiştiş. Serrêke û 10 aşmî ceza  Vesîle Yuksele rê amî birnayîş. Yewin roniştişê Vesîle serra vîyarte 8ê Adare de amî vînayîş û amî tehlîyekerdiş. Dimayê cezaya aye hetê Dadgeha Îstînaf ra amî tesdîqkerdiş û newe ra bi di domanê aye eşrawitî hepisxane.

 

Vesîle eşrawitî hepisxaneyê Tîpa E yê Mêrdînî û verê aye de domana aye Arîna 3 serrî û Avestaya 5 serrî zî estê.

 

Vesîle serra vîyarte de wexto ke tepişnayebî nameyêke eşrawitib û wina vatibî: "Domanê mi gardîyanan ra bawer nêkenê. Yenê verêke mi û vanê 'dayê do ma surgun bikerê, ma vera mede'. Ma înan bi zor danê vindarnayîş. La ez mecbura hewte ra reyke vejî teber. Koxuşe ma teng û zaf serdin a. Lazimîye domananê mi esta ke vejyê teber. Wexto ke domanê mi ageyrenê vanê, ‘Cezaya ma qedya ma tehlîye bî. Nika ma reyna ceza girewte. Cezaya ma biqedîyo ma do tehlîye bibê.' Domanê mi hema nê emrî de vatişê sey ceza, cezakerdiş, tahlîye, surgun musnayî. No zî semedê psîkolojîyê domanan zaf xeter o."

 

Vesîle reyna eynî name de dîyar kerdib ke ê do nê rojan zî derbaz bikerê û wina vatibî: "Wazenê sere bi ma bidê tewênayîş. La pêwa nê çîyan ez sey Kurdêke û dayîkêke ez do binê no çî ra zî vejî."

 

Waştişê serbestîya bi kontrol kerde

 

Vesîla ke kewte prosesêke zehmet, semedê domananê xo cezaya ke amî tesdîqkerdiş, bi hemkarîya avûkatanê xo semedê şertê serbesetîya bi kontrol feyde bigîro muracatê Dozgerîya Mêrdînî kerde. Waştiş Dadgeha Înfazê Mêrdînî rê ame eşrawitiş, bendeyê cewabî ya.