Hîkmet Tunç-Dîlan Babat

 

WAN - Sabîha Gencera ke yewin xeyalê aye ageyro dewe xo, mecbura pesê xo vera zozanan mabêne taxan de biçerêno.  Sabîha dîyar kerde ke pesê aye çin bo aye do bimro û va: "Eke dewlete dewan veng nêkerdêne, ma nika dewa xo de bîne."

 

Sabîha Gencera 58 serre ya 30 serre verê seba polîtîkayê koçberî koçê taxa Suphanê Artemîta Wanî kerd, nika hewl dana pesê xo bido çernayîş. Sabîha bi gopala xo taxe de pesê xo çernena. Sabîha dîyar kena ke ti hêz nêeşkeno aye heskerdişê pesê aye bikero û wina va: "Bi serran o ez serê herra xo ra ameya koçberkerdiş. La ez her wisar ez verê xo dana dewa xo."

 

Sabîha wina dewam kerde: "Verê ma di axor pir kerdêne. La nika 40 pesê mi mendê. Beşêke înan ra wexto ke ma koç kerd telef bî. Hîn zî semedê problemê ekonomî ma rotî. Pesê mi çin bê, ez nêeşkena bicuyî. Mi xo dîyo nêdîyo ez mîyanê pesî de ya. Yewin çimeyê debara dewe pes bi. Mi xêrê pes debara "13 kesî kerd.”

 

Sabîha dewam de da zanayîş ke semedê ekonomî nêeşkena pes rê êm zî bigîro û va ke no semed ra pesê xo taxe de geyrena.

 

Wazena ageyro dewa xo

 

Sabîha peynîye qiseykerdişê xo de dîyar kerde ke ageyro dewa xo û wina va: "Eke dewe nêameyne vengkerdiş, ma hîna uca de bîne. Mabêne dewe û taxe de xeylê cîyayî estê. Dewe de mêrgê ma zaf bî. Lazimî çin bî. Me şit, penîr, goşt û mastê xo pesê xo ra girewtêne. Hêvîya mi a ya ke şer peynî bibo û ageyrê dewa xo."