Şehrîban Aslan

 

AMED - Merdimê hepsîyan dîyar kerdî ke ê hemverê caardişê cilê yew tîpî ke hewl yeno dayîş hepisxanan de bi ca bîyarê, têkoşîn girs bikerê û wina vatî: "Ma do no prosesî ser hepsîyan de bar nêkerê. Ma do bibê yew û ê cilan bidêrnê û bierzê ser rîyê înan."

 

Bi sebebê OHALî bi KHK hûmara 696 ra yeno waştiş ke, caardişê cilê yew tîpî hepisxanan de bikerê faalîyet û reaksîyonê merdimê hepsîyan hemverê nê çî berz benê. Hepisxanan de îşkence û îhlalkerdişê heqan her ke şino kûr beno û merdimê hepsîyan dîyar kenê ke caardişê cilên yew tîp nuqtaya peynî yê ‘îşkencê ya’ û vatî ê do tebera xoverdayîş girs bikerê.

 

'Ma do qebul nêkerê'

 

Merdimê hepsîyan ra Olcay Îlhan dîyar kerde ke dimayê caardişê ‘cilê yew tîpî' ameya rojeve, şîya pêvînayîşê hepisxaneyê Amedî û va hepsîyan caardiş qebul nêkerdê û nêvejîyayê pêvînayîş û wina va: "No caardiş rûmetê merdiman şikneno. Ma keyeyî gerek bêrê têhet û piştdayîş bidê hepsîyan. 12 Êlule de senîn nêameyo qebulkerdiş, do nika zî nêro qebulkerdiş. Her kes zano 12ê Êlule de çi ameyo cuyayîş. Seba nika eynî çî nêrê cuyayîş, gerek ma piştdayîş bidê û verê domananê xo de bê."

 

'No caardiş xeta sûr ê hepsîyan o' 

 

Şehrîban Uyanika ke wayê û kêna ci hepisxane de yê ard ziwan ke caardişê cilê yew tîp xeta sûrê hepsîyan o û wina va: "Merdim nêeşkeno ke normal sîstemêke esteyan gor ra vejenê biewno. O zî qîm nêkeno cilê yew tîpî danê domananê ma ra. Senîn domanê ma vanê ma nêdanê xo ra, ma zî çi destê ma ra bêro ma do bikerê. Muslumanî xebitnenê û heme kesî xapênenê. Şima muslumanê rastî nîyê."

 

'Ma do bibê yew û cilan bidêrnê û berzê ser rîyê înan'

 

Şehrîbane ard ziwan ke cilê yew tîpî hepsîyê sîyasîyan rê nê gerek dizdan rê bêrê dayîş û wina va: "Çi biko serê milê ma, ma do bikerê. Ma no proses serê milê hepsîyan de bar nêkerê. Ma bibê yew û ê cilan bidêrnê û bierzê serê rîyê înan. Ma bi tecrubeyê xo bawer ê. Seba têkoşînî ez veng dana heme merdimê hepsîyan."