AMED - Derheqê hemşaredara Dêrsimî Nurhayat Altune de bi îdiaya ‘endamîya rêxistine’ îdianameyêke newe ame amadekerdiş. Îdianame de ca dayê îfadeyê Gurbuz Topçu ke pêrodayîşê Nurhakî de birîndar ame tepiştiş û bi rojan îşkence ro ci ame kerdiş û Gurbuz Topçu zî dîyar kerd ke îfade aîdê ey nîyê.

 

Derheqê Hemşaredara DBPî yê Dêrsimî Nurhayat Altune de hetê Yewin Dadgeha Cezaya Giran ya Dêrsimî ra bi îdiaya ‘endamîya rêxistine’ îdianameyêke newe ame amadekerdiş. Îdianame de ame vatiş keso bi nameyê Ozer Altaş 19ê Hezîrana 2016an de muracatê Merkezê Xeberdarîya Serekîye kerdo û ser (BÎMER) derheqê Nurhayate de muracat kerdo, derheqê muracatî de ameyo vatiş ke Nurhayate 18ê Hezîrana 2016 de bajarê Dortmundê Elmanya de beşdarê Festîvalê Cinîyan a Zîlane ya Mîyanneteweyî bîya û uca de qisey kerda.

 

Gurbuzî îfade red kerd 

 

Dewamê îdianameyî de ca dayî îfadeyê ke yenê îdîakerdiş aîdê Gurbuz Topçu (Azad Çunguş) ke pêrodayîşê Nurhakî de birîndar ame tepiştiş û bi rojan îşkence ci ame kerdiş. Îfadeyê ke yenê îdiakerdiş aîdê Gurbuzî yê yeno vatiş ke,  Nurhayate şarî dir ameya cayê ke  hetê TSKî ra ameyo bombardumankerdiş û molozê uca vejyayê pak kerdê û a mabêne de Nurhayate dîyo. Gurbuzî dîyar kerde îfadeyê îdianame de yê aîdê ey nîyê û îfadeyêke wina nêdayo.

 

Dozgerî îfadeyê ke ameyî redkerdiş esas girewt

 

Dozgerîya ke heme dosya ercna îdia kerde ke Nurhayate 'mîyanê rêxistine de, çarçewaya peymanê KCKî de bi amancê îdeolojî û amancê rêxistine bîyaro ca têgeyraya'. Dozgerî îfadeyê ke Gurbuzî qebûl nêkerd, esas girewte.  Îdianame bi îdiaya ‘endamîya rêxistine’ ame amadekerdiş, bi dewaya ke Nurhayate tepişnayeya Yewin Dadgeha Cezaya Giran ya Dêrsimî yena hukmkerdiş dir kerdî yew. Roniştişê dewa aşma Sibatê de yeno vînayîş.