Rojda Aydin

 

AMED - Keyeyê hepsîyan reaksîyon hemverê cilê yew tîpî dayî û vatî ke, caardişê wextê  Derbeya 12ê Êlule de hepisxanan de ameyne kerdiş, reynakerdiş. Keyeyan dîyar kerd ke eke qerarê cilê yew tîpî peyser nêro antiş, do hepisxaneyan ra cenaze vejyê û vatî ke ê nêwazenê hepisxaneyan ra cenaze vejyê.

 

Merdimê hepsîyan ra Sabîha Akkaya ke lajê aye hepisxane de yo, va ke wexto ke şîya lajê xo dir hepisxane de pêvînayîş kerdo, lajê aye vato ê do cilê yew tîpî qetî qebul nêkerê û wina va: "Lajê mi, mi ra va ke eke hewce bikero do nêvejîyê pêvînayîş û nêweş bê zî do nêşêrê nêweşxane. Nê çîyê ke domananê ma rê yenê kerdiş wehşet o. No semed ra zî ma zulm qebul nêkenê û çi lazimbo ma do semedê domananê xo bikerê. Bi serran o ser ê ma kurdan de zulm yeno kerdiş, no zulm hîna zî dewam keno û çîyêk nêvuryaw."

 

'Ganî ma wayîrê domananê xo vejîyê'

 

Sabîha ard ziwan ke hukmat wazeno înan wina bitersno û biqedêno û wina va: "Şarê kurdî senîn heta nika ser lingan de mendê û têkoşîn kerdê, do na roje ra tepya zî bi têkoşîn û xoverdayîşê xo serkewte bibê. Seba zulmo ke hepsîyan rê yeno kerdiş sere de ma keyeyî dima ra zîheme şarê kurdî wirzê serê lingan de û dest bi xoverdayîş bikerê. Gerek ma wayîr domananê xo rê vejyê. Eke lazim bo ma zî dest bi çalakîyan bikerê. Hêvîya ma a ya ke sere de Serek Apo û dima ra zî domanê ma hepisxaneyan ra vejyê. Ma wazenê heme hepisxaneyî bêrê padayîş. Eke hepisxaneyî meydan ra bêrê wedartiş û Serek azad bibo o wext heme çî çareser beno."

 

'7 serre ceza lajê mi rê birnayî' 

 

Cinîya bi nameyê Aylîn Kaya ke lajê aye Abdullah Kaya wexto wendekar bîyo ameyo tepiştiş û bi 7 serre Hepisxaneyê Duzce de yo wina va: "Bi nêzdîyê di serre yo ez nêeşkena şîrî pêvînayîşê lajê xo. Semedo ke hetêk ra ez nêweş a û hetêk ra zî ekonomîya mi baş nîya. Cezaya lajê mi qedayîya, gerek înan verê aşme û nîm ey serbest veradayene. La înan 25 ê Hezîrana 2017 de 7 serre ceza ci rê birnayî û ma nêzanê semedê çi yo zî. Ma wazenê demêk nêzdî de tedayê ke serê hepsîyan de yê bêrê wedartiş."

 

'Ma bibê vengê domananê xo'

 

En peynî zî Nazîme Uyanika ke lajê aye heta nika surgunê 4 hepisxaneyan ameyo kerdiş û va nika hepisxaneyê Qeyserî de yo û wina va: "Ma merdimê hepsîyan nêwazenê ke hukmatê tirkan, bi zor cilê yew tîpî bidê domananê ma ro. Ez vana ke heme keyeyî dest bidê yewbînan û ma bê vengê domananê xo. Eke ma vinderê û vengê domananê xo nêresnê dinya, beno ke çîyê zaf xirab bêrê sereyê domananê ma."

 

'Dewlete neyar a' 

 

Nazîme peynîye qiseykerdişê xo de va dewlete neyar a û wina va: "Neyarê pîyan nêbenê dostê lajan'. Wa hayeya ma yewbînan dir bibo, ma şarê kurd û keyeyî wayîrê yewbînan vejyê. Eke ma wayîrê xo û domananê xo nêvejîyê ti kes do wayîrê ma nêvejîyo. Ne ma û ne zî domanê ma na rewşe qebul nêkenê. Gerek cenaze hepisxaneyan ra nêrê vejyayîş."