WAN - JIN TV a ke reng û vengê cinîyan a dîyar kerde ke do dest bi weşan bikera. Senîn cinîyan xebere eşnawitî mesajê piştdayîşî eşrawitî, ma zî pêşnîyarê cinîyan girewt û persê 'şima kanalêke senîn wazenê' pers kerd. Cinîyan dîyar kerd ke gerek torra xeberdarîyêke zerrîwaşte a hîra cinîyan JIN TV bibo.

JIN TV ke wextêke derg o xebatan kena, semedê vîrardişê hîrê sîyasetmedarê cinî ê Kurd ke Parîs de ameyî qetilkerdiş, do dest bi weşan bikera. Senîn cinîyan xebere girewtî mesaj dayî.

Wendekara Unîversîta Şîlan Soylemeze dîyar kerde ke, aye akerdişê kanalî zaf pozîtîf vînena û va: "Xêrcê sîyasetî ma nêzanê cinî se kenê. Cinî mîyanê roje de se kenê? Gerek warê kede de cinî vatişê xo vajê. Ganî cinî her warê cuyayîşî de bêro vînayîş. Roja ewro de sey cinî tena keye de yena vînayîş. Xozaya cinî de berardiş esta."

'Ganî têkoşînê cinîyan bêro vînayîş'

Şîlane da zanayîş ke gerek polîtîkayê JIN TV hîra bo û wina dewam kerde: "Destpêk de ganî rexneyan rê akerde biba. Gerek cinî mexdurîyet ra weta, xoverdayîşê cinî bêro vînayîş. Gerek mîyanê roje de bibê meymanê cinîyan û se kenê, bêro mojnarayîş. Gerek xeberê  cuyayîşê yê aîdê cinîyan bêrê viraştiş."

'Kanal do hêz bido ma' 

Wendekara Unîversîte Rozerîn Urucu zî dîyar kerde ke OHALo ke Tirkîya de ameyo îlankerdiş, hêrişê hemverê cinîyan zêde bîyê û wina va: "Nê hêrişî vernê de hemverê ajansê JINHA bi. JINHA ke vengê cinîyan her warî de dayne eşnawitiş, girewtî. Nika akerdişê JINTV xeylê kêfê ma ard. Ma cinîyan wexto ke na eşnawit, ma xo hîna xurt hîs kerd. Ganî heme cinî wayîrê JIN TV vejyê. Kanalî de ganî tena xebatkar nê zerrîwaşteyî zî estbi.

'Gerek bernameyê kulturî estbê'

 Fatma Îlter zî ard ziwan ke heme taxan de semedê JIN TV xeberê kulturî estbê û va no kanalî de bêro vatiş ke xeylê heqê cinîyan esto. Gerek bimojnê ra ke cinî eşkenê her karî bikerê û serê linganê xo de vindenê.