DÊRSIM - Eda Aggula ke 7 serre ya xo ra heta nika bi muzîkî dir eleqedar bena û 14 enstrumanî xebitnena. Eda Pilûrî Dêrsimî ra ya û dîyar kerd ke a wazena perwerda bido her emrî merdim û taybetî cinîyan. Eda ard ziwan ke muzîk cinîyan azad keno û hepsê keyan nêbê.

 

Eda Aggula ke Pilûrê Dêrsimî de cuyena, 7 serre ya xo ra heta nika muzîk dir eleqedar bena. Eda ard ziwan ke muzîk hacetê azadkerdiş û xo îfadekerdişî yo û va 8 serre ya xo de mey, ney, zirna û bilûre musaya û wina va: "Dima ra saz, gîtar, def bi pêroyîde mi 14 entrumanî pirodayîşê înan musaya.  Ez tercîhê xo hetê vengê tebîî xebitnena."

 

Eda ke seba vengkerdişê dewan Pilûr ra bi keyeyê xo dir koçê Xarpêtî kerdî û uca pîl bîya û wina va: " Mamosteya mi Nacîye Coşkun piştdayîş da mi. Nota mojna mi. Muzîk konseptêke ser her tewir statu, sinife û zayendî yo. Ez şîya hetkarîya xeylê wendekarê ke kewtî îmtîhanê konservatuarî. Înan zî dima ra çîyê ke musabî, mi rê mojnayî. Ma nêbî mamoste, wendekar. Ma pîya mojna. Ma yewbînan aver berd. Mi heskerdiş û rêzdarî înan ra dî.  Mi zaf ca de konser da.

 

'Îmkan bidê xo'

 

Eda da zanayîş ke dimayê ke zewicyaya keyeyê xo Pilûrî rê bar kerdo û pirodayîşê sazê xo dewam kena. Eda da zanayîş ke aye hewl dana domananê xo bi kulturê xo pîl bikera û wina va: "Ez wazena Pilûr de muzîk hemine rê bimusnî. her emrî û taybetî cinîyan. Wa cinî nêewnê emrê xo ra. Wa tena hepsê keyeyî nêbê. Her kesê ke eleqeyê înan esto eşkenê bimusê. Muzîk cinîyan azad keno. Îmkan bidê xo."