Duygu Cînîvîz

 

AMED - Gulîstan Tokdemîra ke kilaman vana, kulturê kurdan dana cuyayîş û derheqê tedayê ser kulturê kurdan wina va: "Mi bi cil û belgê xo veng da kilamê ke ver bi çinbîyayîş de yê. La xeylê cayan de ma vejyayne ser sahne, ceyran ameyne birnayîş ya zî ameyne betalkerdiş. La ma do bi cesaret kilamanê xo rê dewam bikerê."

 

Gulîstan Tokdemîra ke Semsur ra beşdarê kombîyayîşê Amed de ser nameyê 'Cinî proses munaqaşa kenê' beşdar bî, bi cil û belgê xo yê mintiqa eleqeyêke pîl dî. Gulîstane bi 7 serre yo ser muzîkê etnîk de xebityena û kilamê ke aîdî Semsurî nimte mendê newe ra vana û hewl dana ke bi komelî bido qebulkerdiş. Gulîstane wina va: "Ma do wayîr kultur û ziwanê xo vejîyê. Ez bawer kena ke do cinî, bi cesaretê kulturî hîna azad bibo. Semsur de polîtîkayê asîmîlasyonî zêde yo. Keyeyî bi domananê xo dir kurdî qisey nêkenê. La ma wayîr ziwanê vejyayî û ma do her wext kilamanê xo vajê."

 

'Ma nêeşkenê heqîqetê xo ra dûr bimanê'

 

Gulîstane da zanayîş ke semedo ke kilamê Kurdî vana û cil û belgê netewî dana xo ra zaf zehmetî anto û wina va: "Ez kilamê mintiqayê ma bi Tirkî û Kurdî vana. Heta ez wazena ê kirmanckî yê zî vajî. Bêguman ez serê sahne de rastê zehmetîyan ameya. Semedo ke ez bi cil û belgê mintiqa vejyaya ser sehnî mi zaf reaksîyon girewtî. Vatêne ‘çira ti bi nê cilan vejêna sehne, cilê modernan xo ra de.' No tabloyêke zaf bi dej o. Bi cil û belgê neteweyî vejyayîşê ser sehne manayîn o. Pêwa her zor û zehmetî 7 serre yo ez bi şale vejêna ser sehne. Semsur de polîtîkayê asîmîlasyonî zêde yenê kerdiş. Wextê peyînan de zêde bîyo. Ez bi cil û belgê xo veng dana kilamê ke ameyê xovîrrakerdiş. La xeylê cayê ke ma vejyayne sehne, ceyran amey birnayîş, konser ameyî betalkerdiş."

 

'Ma tarîxê xo baş nêzanê' 

 

Gulîstana ke eynî wextî de kênaya Haşîm Tokdemîra zî wina va: "Ez pîyê xo dir kilamê Semsurî cigêrayîş kena. Ma zanayîşê ke nimte mendê kom kenê. Ma wayîrê tarîxêke xurt ê la ma no tarîx baş nêzanê. Taybetî doman û ciwan î eleqeyêke pîl ziwanê Kurdî rê mojnenê ra. Ma do wayîr ziwanê xo vejîyê."