Ronîda Hacî  

 

TIL TEMIR - Şerwana YPJî Zagros Egîd komploya mîyanneteweyî ke hemverê Rayberê PKKî Abdullah Ocalan ame kerdiş şermezar kerde û va: "Komploya mîyanneteweyî hemverê xoverdayîşê azadî ameya kerdiş. Ma do heta peynî xover bidê û bi fikir û felsefeyê Rayber Apo azadiya xo bi dest bikerê."

 

Şerwana  Yewîneyê Pawitişê Cinîyan (YPJ) Zagros Egîd komploya mîyanneteweyî ke hemverê Rayberê PKKî Abdullah Ocalanî de virazya şermezar kerde û wina va: "Komploya ke hemverê Rayber Apo virazya, semedê xoverdayîşê azadîya şaran û cinîyan bi. La bi fikir û felsefeyê Rayber Apo cinî hîna xurt bî û bi îradeyêke xurt herikyayî waran. Çunke azadîya serekî azadîya cinî û şaran a."

 

'Cinî bi fikrê azadî hêzê xo girs kerd'

 

Şerwana YPJî Zagros, da zanayîş ke cinî rayîrê felsefeyê Abdullah Ocalan de resayî rastî û wina va: "Şorişê Rojawanî de cinî bi fikrê azadî hêzê xo girs kerdî û xo îspat kerdî. Eynî wextî de semedo ke heqê cinîyan bêro pawitiş û cinî biresê rastîyê xo Yewîneyê Pawitişê Cinîyan ame awankerdiş. No zî xêrê fikr û felsefeyê Rayber Apo bi. Nika YPJ ça de zordarîke ser cinî de bivînê hewl danê ke cinî xilas bikerê û zîncîrê koletî bişiknê. Cinî û komel pîya girêdayeyê û ma do heta peynî heqê cinîyan bipawê û pey xeta Rayber Apo bê."  

 

'Şorişê rojawanî bandurêke pozîtîf ser cinîyan de kerd'

 

Zagrose wina va: "Verê Şorişî, cinî wayîrê heqê qiseykerdişî nêbî. Her hat ra îqtîdar ser cinîyan de bandure viraştêne. Cinî nêeşkayne xo îfade bikero û pawitişê xo bikero. La wexto ke şoriş dest pêkerd û felsefeyê Rayber Apo ke bi serran o semedê azadîya cinîyan xizmet keno vila bi, o wext her cinî wişte ser lingan û mîyanê şorişî de cayê xo girewtî. Cinî hem milê leşkerî ,sîyasî hem zî milê komelî de cayê xo girewtî. Şorişê Rojawanî bi şorişê cinî yeno naskerdiş. Şorişê rojawanî bandurêke pozîtîf ser cinîyan de kerd."

 

Cinîya Rojhelatî hemverê koletî vindena! 

 

Zagrose, dîyar kerde ke heme zerrîya cinîyan têkoşînnê Rojhelatî de bi yew û wina va: "Vengdayîşê ma heme cinîyê Rojhelatê Kurdistanî ra a ya ke hemverê îqtîdarî û koletî sere wedarnê, heta bieşkê zincîrê koletî bişiknê û sereyê xo hemver dişminê xo nêtewenê. Çunke cinîyê Rojhelatî felsefeyê Abdullah Ocalanî îlham gênê û ê zî hemverê komployê mîyanneteweyî vindenê."

 

Zagrose, peynîye qiseykerdişê xo de wina va: "Cinî bi hêz û keda xo pey xeta Rayber Apo de şinê. Heta ma biresê azadîya xo û serekê xo azad bikerê ma pey xeta serekê xo de şêrê."