BEDLÎS - ÎHDyê Bedlîsî, Goristanê Xerzanî de cigêrayîş kerd û rapor amade kerd. ÎHDî dîyar kerd ke goran veng kerdê û esteyêke zî nêverdayê.

 

Komeleyê Heqê Merdiman (ÎHD)yê Bedlîsî, Goristanê Xerzanî ê Olaka Corîn ke 267 cenaze ci ra ameybî vetiş û eşrawitîbî Sazgehê Tipê Edlî yê Stenbolî cigêrayîş kerd. Dimayê cigêrayîşan ÎHDî raporêke amade kerd û da zanayîş ke keyeyan muracatê înan kerdo, înan goristan de cigêrayîş kerd, raporo ke amade kerdî bi raya pêroyî rê eşkera bikerê.

 

Muracatê keyan

 

ÎHDî da zanayîş ke înan 24ê Kanûne 2017an de Goristanê Xerzanî cigêrayîş kerdê û nê çî vatî: "Îdiayê ke kewtibî rojeva raya pêroyî; goristan ameyê xirabkerdiş, bê xebera keyeyan cenaze goran ra vetê û eşrawitê Sazgehê Tipê Edlî yê Stenbolî. Dimayê keyeyêke muracatê Serdozgerîya Komara ya Bedlîsî kerd, hedîse bi rayîrê çapemenî ame eşnawitiş û serê medyaya komelî vila bi. Derheqê hedîse de muracatê komeleya ma zî kerdî û waştiş ame kerdiş ke goristan de cigêrayîş bêrê kerdiş. Qerarê destpêkî zî o bi ke ganî cayê hedîse de cigêrayîş bêro kerdiş, serekê komeleya ma û endamê heyetê îdarekerdişî ameyî wezîfekerdiş."

 

'Goran rijnayê' 

 

Goreyê zanayîşê heyetê ÎHDî, goristan bi temamî ameyî rijnayîş û nê zanayîşî ameyî parekerdiş: "Cigêrayîşî ke ameyî kerdiş de; wareyê goristanî dewa Oleka Corîn ê girêdayê merkezê Bedlîsî, bi makîneyê kar rijnayê, dimayê cigêrayîşî dîyar bi ke gorî veng ê, mintiqa de rijnayîşêke pîl esto, warê goristanî de xeylê sîyê goran ê kesk, sûr û zer ke nuştiş û sembol serdeyê ameyî vînayîş. Mintiqa de ti esteyê aîdê cenazeyan nêameyê vînayîş. Wextê cigêrayîşî de kilmî vîdeo û çend fotografî ameyî antiş."

 

Goreyê zanayîşê heta nika 5 keyeyan muracatê komela kerdê. ÎHD, Weqfê Heqê Merdiman ê Tirkîya (TÎHV) û Komeleya Huqûqnasê Azadîwaştoxan (OHD) eşkera kerdî ke ê do mudaxîlê prosesî bibê.