Zeynep Turgut-Hîkmet Tunç

 

WAN - Taxa Sûphanî yê girêdayê qezaya Artemetî pîyabîyayîşê cinîyan semedê xoserîya ekonomî beno alternatîfêke. Cinîyê taxe berardişê ke bi destê xo viraznenê, bi viraştişê pêkayan bigî rê heta hacetê eştan ra xemlê keyeyan bi destê xo viraznenê.

 

Taxa Sûphanî yê girêdayê qezaya  Artemetî cinî semedo ke warê ekonomî de xoserîya xo awan bikerê, alternatîfê xo awan kenê. Cinîyê taxe bi îmkanê xo her roje yenê têhet û bi no hawa xebatêke hempar kenê. Cinîyan dîyar kerd ke ê bi viraştişê hûnerê destan destûr nêdanê wextê înan veng derbaz bo û vatî ke xebatêke hempar ra xoserîya ekonomî vejeno meydan.

 

'Viraştişê pêkayan, temaşekerdişê rêzefîlman ra hîna baş a'

 

Cinîya bi nameyê Sevînç Erole ard ziwan ke viraştişê pêkayan ked û zehmetîyêke pîl wazena û wina va: "Ma layê barî weçînenê û goreyê ê layan pêkayan amade kenê. Dima ra zî bi layê en weş, xemlê keyan û pêkayan viraznenê. Ma warê ekonomî de hem keyeyê xo rê hem zî domananê xo rê benê destek. Camêrdî her wext wazenê ke cinî hewceyê înan bê. Û bi nê nêzdbîyayîşan heme caardişan xo rê rewa vînenê. Ma cinî eşkenê ekonomîya xo awan bikerê. Eke ma xo ra bawer bê ma eşkenê cuyake newe awan bikerê. Merdim bi hunerê destan rê eleqedar bo, temaşekerdişê rêzefîlman weştir û wateyîn o."

 

'Wexto ke ma yenê têhet parekerdişê ma hîna zêde benê'

 

Sanîye Erol zî ard ziwan ke ê verê viraştişê pêkayan cuyake hempar awan kenê û wina va: "Wexto ke ma karê xo yê rojane qedênenê, dest bi viraştişê pêkayan û xemle keyan kenê. Her çiqas ma erjan xebityenê zî, semedê ma pîyabîyayîş bi mana yo. Ez Amelîyatkerde ya û bi gampole rayîra şina. Roniştiş de zî ez zehmetî ancena. La ma hesabê rincanbîyayîşê xo nêkenê. Wexto ke ma yenê têhet, ma pîya klaman vanê. Parekerdişê ma zêde benê no zî semedê ma girîng o. Layê ke ma gênê vayê. Viraştişê înan çiqas zehmet bo zî viraştişê hunerê destan ê tewir bi tewir kêfweş benê."

 

'Eke cinî biwazê eşkenê bi her tewir berardiş bikerê'

 

Cinîya bi nameyê Meryem Erole zî da znayîş ke ê bi viraştişê pêkayan û parekerdişê cinîyan xurt kenê û wina va: "Ma tîya hem cîran û hem zî nasê yewbînan ê. Keyeyê mi de 2 nêweşê mi estê. La wa cinî bizanê ke sey ke merdim xoserîya ekonomî bi kedê destê xo bi awankerdişî weştir nîyo. Ez veng dana heme cinîyan, destûr medê ke têkilîyê cîranî bimrê. Eke ma heme pîya yewbînan ra bawer bikerê, ma eşkenê her çî ra berardiş bikerê."