MÊRDÎN - Cemîle Bîlena ke 2017 de aşma teşrîna peyêne de, mezraya Yayalarê Dêrikî de pêrodayîşê camêrdan de amî qetilkerdiş raporê otopsîyê aye temam bi. Goreyê raporî hîrê gule ginayê bedenê Cemîle ro û sere, mil û çaqeyê aye şikyayê. Rapor de ame vînayîş ke Cemîle rastê şîdet û îşkence ameya. Derheqê qetilkerdişê Cemîle de di kesî ameyî girewtiş û merdimê Cemîle waştî ke her kesê ke beşdarê hedîse bîyê bi hawayêke giran bêrê cezakerdiş. 

 

Cemîle Bîlena 55 serrî teşrîna peyêne 2017 de, Mezraya Yayalarê Dêrikê Mêrdînî de amî qetilkerdiş. Ame zanayîş ke Cemîle şerê mabêne camêrdê keyeyan de hedef ameya girewtiş û bi guleyê ke bedenê aye rê ginayê piro cuya xo vinî kerda. Rapor de ame îspatkerdiş ke Cemîle dimayê ke ameya qetilkerdiş ra dima hetê camêrdan ra reyna rastê şîdetî ameya. 

 

Vernê de dayî piro û dima ra îşkence kerdî 

 

Hunîgul Bîlena verê zanayîş dabî ajansê ma wina vatibî: "Dimayê ke ma ameyî keyeyî înan, semedê birîndaranê xo  wesayît ardî û birîndaranê xo berdî. La maya mêrdeyê mi saetêke uca de mende. Ma tersan ra nêeşkayne uca ra bîyarê. Ma rew bişîne nika cuyayne. La gonîya aye zêde şîbî. Bi birîndarî dabî maya ma ro. "Goreyê raporê otopsî îdia teqez bî. Ame zanayîş ke gule ginayo sere, sîne û pîzeyê aye piro û bi birîndarî îşkence ci ameyo kerdiş. Sere, mil û lingê aye de şiknayîş esto." 

 

Dimayê qetilkerdişê Cemîle ra dima lajê aye Lokman Bîleno ke beşdarê şer bibi ame tepiştiş û amebi îdiakerdiş Lokmanî dayo Cemîle ro. Netîceyê cigêrayîşê balîstikî de vejya ke gule sîlehê Ahmet Bîlen û Mehmet Saît Bîlen vejyayo. Gumanbaran îfadeyê xo de dîyar kerdî ke dimayê ke dayê Cemîle ro şîdet ci kerdê. 

 

Merdimê Cemîle dîyar kerdî ke ê wazenê sucdar cezaya en giran bigîrê û vatî: "Cinîya bêguna bi hawayêke wehşî qetilkerdî û dima ra îşkence ro ci kerdî. 15 kesî beşdarê hedîse bîyê la tena di heb girewteyê. Ma wazenê heme berpirsîyarî bêrê hukmkerdiş."