Zeynep Turgut

 

COLEMÊRG - Colemêrg de 8 cinî semedo ke xoserîya xo ya ekonomî awan bikerê kom bî û hawayêke hempar terzîxaneyê bi nameyê 'Fîstan' akerdî.  Cinîyê karkeran dayî zanayîş ke semedê xoserîya ekonomî yewîya cinîyan şert o. 

 

Tarîx ra û heta nika warê ekonomî de heqê cinîyan her wext ameyo pelçiqnayîş. Her çiqas Tirkîya de hûmara karkerê cinîyan zêde bo zî, keye de, hetê ekonomî de teber de çin yena hesibnayîş. La hemverê heme hişmendîyê îqtîdarî zî, cinî ekonomî de alternatîfê xo awan kenê. Colemêrg de 8 cinî semedo ke xoserîya xo ya ekonomî awan bikerê, bi îmkanê xo terzîxaneyê bi nameyê 'Fîstan' akenê. Terzîxaneyê ke ameyo akerdiş de en zêde fîstan yenê derznayîş. Cinîyê karker dîyar kerdî ke amancê înan o yo ke xoserîya xo ekonomî awan bikerê. 

 

'Ma hemverê îhlalkerdişê heqan xo ver danê' 

 

Karkera bi nameyê Yildiz Açare ard ziwan ke bi akerdişê terzîxaneyî aver şîyê û va ke terzîxane de her cinîyêke rengêke têkoşînî ya û wina dewam kerde: "Her warê cuyayîşî de heqê cinîyan yenê îhlalkerdiş. En zêde zî warê ekonomî de heqê cinîyan yeno werdiş. Gama ke merdim ewnîyeno Tirkîya ra hûmara cinîyê karker, hûmara camêrdan ra hîna zêde ya. Bi rastî fikrêke bi no hawa hişê  ma de çin bi. Ma cinîyan her wext zaf waştêne ke bi hawayêke hempar pîya bixebitîyê. Ma 8 cinî bî û ma deştişê cil û belgan fam kerdêne. Dima ra ma pîya qerar da û ma va ma cayêke winî akerê ke tena cinî bixebitîyê û tena rengê cinîyan bibo. Terzîxane de en zêde ma fistanan derznenê. Xora ma nameyê terzîxane zî kerdo Fîstan. Ma her roje serê siba yenê, bi kêfweşîyêke pîl pîya cilan derznenê. Cuya ma mîyanê xebate de hempar a. Warê ekonomî de hemverê îhlalkerdişê heqan de têkoşînêke ma esto." 

 

'Ma hem awankerdox ê û hem zî berardiş kenê' 

 

Yildize da zanayîş ke ê tena nêxebitênê, eynî wextî de têkoşîn kenê û va ke ganî warê ekonomî de nasnameyê cinîyan bêro naskerdiş û wina va: "Dimayê ke ma no terzîxane akerd û dima ra  cinîyê derûdor zî yenê verê ma û wexto ke karê ma çin bo zî yenê ma dir cuya xo pare kenê. Ma tena nêxebityenê, eynî wextî de ma cuyake hempar û xo ver danê. Nika ma 8 cinî yê. Ma wazenê hûmara cinîyan zêde bikerê, hem zî kargehê xo hîra bikerê. Amancê ma o yo ke ma kooperatîfê cinîyan awan bikerê. Wext wextê ke êdî cinî xoserîya ekonomî awan bikerê yo. Ganî cinî êdî hewceyê camêrdan nêbê. Semedo ke awankerdiş û berardişê ke cinî kenê camêrdan ra tewr zêde yo." 

 

'Ma bi xoverdayîş bîyayîşê xo îspat kenê'  

 

Yildize peynîye qiseykerdişê xo de ard ziwan ke gerek cinî piştdayîş bidê yewbînan û wina va: "Ma kargeh de tena kar nê ma astengîyê ke derheqê cuyayîşî de cuyenê pîya pare kenê. Kerdoxê ma heme cinî yê. Eke ma cinî wazenê her warî de bîyayîş û rengê xo awanbikerê, lazimo ke ma têkoşîn bikerê. Ma wazenê ke her cinîyêke bi îmkanê xo warî ekonomî de aver berê û hewceyê camêrdan nêbê."