Medîne Mamedoglu

 

AMED - Zelîxan Ceylana 60 serrî ke taxa Alîpaşayê Sûrî ke rijnayîş dewam keno cuyena, va ke yewin bendewarîya aye serra newa ra a ya ke Sûr de bimano û bicuyo. Zelîxan wina va: "Ma fam nêkenê ke derdê ma pere nîyo. Semedo ke ma fam bikerê, gerek tîya şahîdî bikerê. Heta nêro cuyayîş kes fam nêkeno."

 

Şarê Sûrî do serra 2018an çadire de pêşwazî bikerê. Qedexe ra di serrî derbaz bi la hema zî kewtişê 6 taxan qedexe yo. Taxê Alîpaşa û Lalebeyî ke 23ê Gulane de rijnayîş tede yeno destpêkerdiş, yenê çinkerdiş.

 

Zelîxan Ceylana 60 serrî bi di kênayanê xo dir taxa Alîpaşa de cuyena û semeod ke keyeyê aye nêro rijnayîş qet keyeyê xo ra nêvejêna.  Zelîxane dîyar kerde ke zimistanî cayêke tede şêrê çin o û wina va: "No zimistanî ma ça de şêrê. Cayê ke ma şêrê bibo zî ez keyeyê xo nêdana înan. Wa Homa heqê ma înan rê nêverdo. Her roje yenê vanê ‘vejîyê'. Eke bi zor vejê ez do hacetanê xo vejî teber û ez do înan xo dir biveşnî. Qet nêbo do o wext merdimî ma fam bikerê û do vajê a cinî hemverê nê caardişan ganê xo feda kerd."

 

'Derdê ma pere nîyo' 

 

Zelîxane dewam de da zanayîş ke bi 35 serrî yo no banî de cuyena û qiseykerdişê xo wina dewam kerde: "Her roj verê çimanê mi de keyeyêke şîne. No zî semedê ma zaf zor bi. Her oje cîranêke mi, merdimêke mi şîne. Nê 3-4 aşme yo ma zanê çi cuyayê. Ne keyeyê ma esto û ne zî herrêke ma bîn. Vanê ‘vejyê ma do 6 aşmî kîrayê şima bidê' La dimayê 6 aşman ma do se bikerê. Ma fam nêkenê ke derdê ma pere nîyo. Semedo ke ma fam bikerê ganî şahidî bikerê. Heta ke nêro cuyayîş kes ma fam nêkeno."

 

Zelîxane peynîya qiseykerdişê xo de ard ziwan ke yewin waştişê înan serra newa ra a ya ke serra ameyox de Sûr de bimanê û bicuyê.