Melîke Aydin

 

DÊRSIM - Hatîce û Medîne bi kedêke pîl mît kenê, dima ra kenê nan û pê debara xo kenê. Medîne û Hatîce bale ancenê ser piştdayîşê cinîyan û vanê: "Cinî tersê xo bi piştdayîşî eşkenê derbaz bikerê.

 

Taxa Alî Babayê Dêrsimî de boye nanê germ û teze her ca de vila bena... Ma zî boye nanê germî taqîb kenê û şinê çimeyê ci. Boye nanê germin ke bi kede ameyo viraştiş, ma resnena cinîyê bi nameyê Medîne û Hatîce Akbayir. Karê ke Hatîce û Medîne kenê zaf girîng o. Semedo ke hurdiyan zî ewnîyayîşê camêrdan ke ‘camêrd pere qezenc kenê, cinî karê keyeyî kenê' pîya şiknayî û dîyar kenê ke înan bi piştdayîşê cinîyê taxe dir nê ewnayîşan şiknayê.

 

'Nê bi asteng la destek zî nêkerdê

 

Medîne da zanayîş ke bi aşmêke û nîm karî kenê û qiseykerdişê xo wina dewam kerde: "Camêrdî berpirsîyarê keyeyî gênê la mi no ferasetî şikna. Heta ereyê şewe wextê ke mi nan antêne estbi. Belê mêrdeyê mi nêbi asteng la hetkarî zî nêkerd. Gerek cinî hêzê xo ra bawer bikerê."

 

'Ez bixo serberz a' 

 

Hatîce ard ziwan ke Dêrsim de cuyayîş zaf vay o, betalî zêde yo û hemverê nê çî zî vayî zêde yo û nê çî ard ziwan: "Ez bixo serberz a. Semedo ke ez nano helal bena domananê xo ra. Goreye mi cinî gerek tersê xo bi piştdayîş orte ra wedarnê. Gerek bi Sazgehê cinîyan dir hîsê piştdayîşî bêro awankerdiş. Sîstem eynî karî bi cinî û camêrdan dano kerdiş la camêrdî hîna zêde pere gênê. Mi heta nika kolî antî, pakitî kerd, ser ê erdan de xebityaya. Cinî wayîrê hêzê ke eşkenê her karî bikerê. La semedê camêrdan eynî çî derbaz nîyo."