WAN - Bi KHK dir hûmara 696an caardişê kadroyê bi ‘Şertê îmtîhanî' semedê karkerê taşeronan ame kerdiş û hemverê ci reaksîyon yenê mojnarayîş. Hemsereka Şaxa DÎSKî yê Wanî Emîne Kurt dîyar kerde keTirkîya ke bi mîlyonan karkerê teşeron estê, bi dayîş kadroyê semedê 4 hezar karkeran no problem nîno çarserkerdiş.

 

Hemsereka Şubeyê DÎSKî yê Wanî Emîne Bozkurte reaksîyon hemverê caardişê kadroyê ‘bi şertê îmtîhanî' ke semedê karkerê taşeronan bi KHKa kewt cuyayîş da û derheqê babete de şîrove kerde. Emîne dîyar kerde ke bi KHKa yê ke en peynî ameyo vetiş 60 endamê DÎSKî kar ra ameyê vetiş û va heta nika KHKyê ke ameyê vetiş semedê başîya karkeran nîyê.

 

Emîne ard ziwan ke bi KHKyê peynî semedo ke karkerî derbazê kadro bibê şertê ‘heqê ke ameyê qezençkerdiş feragat bikerê' danê vernî û qiseykerdişê xo wina derg kerde: “Wexto ke karkerî derbazê kadro bibê, înan ra yeno waştiş ke dest heme heqanê xo ra vera bidê. Heqê tezmînatî zî tede yeno waştiş heme heqanê xo ra feragat bikerê. Yanî keda bi serran ê karkeran yena çinkerdiş."

 

'Hal zaf xirab o'

 

Emîne bale ant ser şertê ‘îmtîhanî’ û wina ard ziwan : "No hal do hemine mexdûr bikero. No winî îmtîhanêke qij nîyo. Kesoke pakitî keno wendiş û nûştişê ci çin o. Ya zî halêke ey ê qanûnî esto nêeşkeno karêke bîn de bixebitîyo. Bi îmtîhanî dir do xeylê karkerî, kar ra bêrê eştiş. Nameyê ci îmtîhan nê, cigêrayîşê asayîşî yo. Wan de derheqê endamê xebatkarê fîrmayî de çarçeweya KHKa ke ameyo vetiş de binê nameyê formî de belge yenê amadekerdiş. Wan û qezayê ci semedê xebatkaran form ameyê amadekerdiş û hûmara 696an KHKa ame zêdekerdiş. Paragrafêke metnî de şertê keso verê xebityeno gerek têkilîyê xo bibirno û heqê xo nêwazo ca gêno. Tîya de heqê kesî, raste rast yeno vindarnayîş. Bi nê caardişan do heme karkerî heqê xo ra bêpar bimanê. No hal zî zaf bi dej o."

 

'Bê şert û merc kadro'

 

Emîne peynîya qiseykerdişê xo de dîyar kerde ke Tirkîya de bi mîlyonan karkerê taşeronî estê û bi derbazkerdişê 4 hezar karkerî semedê kadroyî problemêke çareser nêkeno û va ê bê şert û merc kadro wazenê.