Zulal Koçer

 

STENBOL - Sekretera Pêroyîya DÎSKî Arzu Çerkezoglu caardişê kadroyî bi şertê 'îmtîhanî' yê bi KHKa hûmara 969an semedê karkeran ardê, şîrove kerde û va karkerî biwazê derbazê kadroyî bibê, rastê şertê ci heqê xo yê netîceyê dewayê qezençkerdişî de feragat bikerê, bêrê.

 

KHKa hûmara 696 ke hetê hukmatê AKPî ra ame vetiş, xeylê munaqeşe zî xo dir ard û KHKyî de semedê hêzê paramîlîter muafiyetê hukmkerdişî ardî û heto bîn ra caardişê cilê yew reng zî hepsîyan rê ardî. KHK de sererastkerdişê bîn o ke bale anceno zî caardişê ‘kadroyê şertê bi îmtîhanî’ semedê karkeren ardî. Sekretera Pêroyîya DÎSKî Arzu Çerkezoglu derheqê babete de şîrove kerde.

 

'Hetan dir muzakere nêkerdî'

 

Arzu ard ziwan ke karkerê taşeronî bi serran o semedo ke kadro bigîrê têkoşîn kenê û wextê AKPî de hûmara karkerê taşeronan zêde bîyo û va: "Bi KHK yê peynî dir dayîşê kadro semedê karkerê taşeronan 4 mîlyon kesî eleqedar keno. No sererastkerdiş verê ke bi hetan dir muzakere bêro kerdiş, bi KHKa ameyo vetiş. No zî hetê ma ra nîno qebulkerdiş."

 

No serarastkerdiş do çî bîyaro?

 

Arzu qiseykerdişê xo wina dewam kerde: "KHKa çarçeweya babeta ke karkeran eleqedar kena de bicakerdiş hemverê destûrê bingehînî yo. Ma bi ti hawa qebûl nêkenê ke no sererastkerdiş bi KHK kerdê mîyanê cuyayîşî. No sererastkerdiş do mexduriyetê newe bîyaro. Sazgehê girêdayê wezaretî de 450 hezarî şaredarîyan de 400 hezar karkerî xebityenê. Xebatkarê şaredarî çarçeweya nê sererastkerdişî de sey karkerê îstîmlakkerdişî do nêrê îstîhdamkerdişî. Do şîrketê şaredarîyan de bêrê xebitnayîşî."

 

Arzu ard ziwan ke 450 hezar karkerî îstîmlakkerdişî de xebityenê zî do mexdurîyetêke winî bicuyê û şertê ci zî heqê xo qezençkerdişî de feragat bikerê danê vernîya înan. Arzu wina va: "Embazan ra yeno waştiş ke heqê xo yê ke dewa ra qezenc kerdê feragat bikerê. 'na babete de xeylê dewayê ke ameyê qezenckerdiş estê. Heto bîn ra gerek îfade bikerê ke derheqê ameyox de zî waştişê akerdişê ti dawa nêkerê. Yeno vatiş do îmtîhan bîyarê. Îmtîhanê nuşteyî, caardiş û vatişî do bibo. Îmtîhan merkezêke îmtîhanî de nîno kerdiş. Her sazgeh do bixo bikerê. Semedo ke îmtîhanê vatişî esto winî asîyeno hetkaranê xo rê rayîr akerê."

 

Arzu peynîye qiseykerdişê xo de da zanayîş ke xebate pêroyî de hemverê huqûqî ya û bi hawayêke kêfî ya û do bê şert û nêtudiştî kadro bêrê dayîş. Heto bîn ra Arzu dîyar kerde ke ê sey DÎSKî na babete de çi biko ser ê milê înan do bikerê.