Melîke Aydin

 

DÊRSIM – Tarîx re nata vera elewîyan de polîtîkayê çinkerdiş, qirkerdiş û qirkerdişê kulturî dewam keno. Bi  hawa keyeyê elewîyan bi boyaxê sûre yenê nîşankerdiş û dima re qetlîam dest pêkeno. Komelî de fehmê ‘sewbîna kesî ma re nîyî’ mezgê merdiman de yeno bicakerdiş. Eksê nê fehmî şarê elewî zî bi felsefeya ‘kabeyê mi merdim o’ seba esteneya xo têkoşîn dano. Her çiqas ke têkoşîn bibo reyna zî mîyanê elewîyan de fehmê desthilatdarîya camêrdî hakim o.

 

Babete ser o Sereka Komeleya Dewa Alkavakê Tokatî û Rojnamegera Vengê Anatolî yê Rojnameyê Tokatî Mahbup Dîleke qisey kerde û  dîyar kerde ke cuya aye de vera fehmê desthilatdarîya camêrdî û fehmê feodalî de têkoşîn esto.

 

Mahbupe ke çend serrî ver Tokatî re koçê Stenbolî kerde, destpêkê qiseykerdişê xo de va ‘ez kulturê xo re xerîb bîya û ma ameyî asîmîlekerdiş’ û wina dewam kerde: “Badê ke mi na rewşe ferq kerde, mi det bi rojnamegerî kerde. Mezgê mi de persê ‘ez do seba komelî se bikkera’ virazîya. Bi no hawa mi rojnamegerî kerde. Şarê elewî yenê teberkerdiş. Mi xo bi xo va; gelo ez do vera asîmîlasyonî de senî têkoşîn bikara. Mi cewabê persê xo rojnamegerî de dî. Bi no hawa ez hewl dana ke vengê şarê xo bida eşnawitiş.”

 

Wa cinî kesêk re piştî û destûr nêwazî

 

Mahbupe dewamê qiseykerdişê xo de zî bale ante kêmîya hûmara cinîyan ser û wina domnaye: “Hûmara cinîyan komel û taybetî zî komeleyê dewan de tay a. Komel hema zî nêmsayo serekbîyayiş û hemserekbîyayişê cinîyan. Ganî no fehm bêro şikînayiş. Ez bi xo hewl dana ke no fehmî bişikna. Badê ke ez bîya îdarekara komeleya dewa Alkavakî, şîyayiş û ameyişê cinîyan virazîya. Îdareyê komele de tena 3 cinî estbî. Wa cinî kesêk re piştî û destûr nêwazî. Ez hem rojnamegerî û hem zî serekîya komeleye kena. Ez wazena ke cinî bi cesat bibî. Ganî ma çîyê tewr baş bikerî. Ma cinî eşkenê komelî camêrdan re hîna baş îdare bikerî. Cinî eşkenê aştî bîyarî.”