Zulal Koçer

 

STENBOL - Problemê kedkarê keyeyan qet nêqedîyenê. Xebata karkerê keyeyan qeydan de çin î û bêsîgorta yenê xebitnayiş. Babete ser o Sereka Sendîkaya Kedkarê Keyeyan ÎMECE Ayten Kargine qisey kerde û serra 2012î re nata hewl dana ke xebata xo ya 10 serran mehkema de îspat bikera. Aytene qiseykerdişê xo de qala hîkayeya cuya xo kerde û nika hewl dana ke xebata xo mehkema de bida îspatkerdiş. Mehkemaya Aytene 5ê kanûne de ame dîyîş û taloqê 2018î amey kerdişe.

 

'Îspatkerdişê xebatê'

 

Aytene ke 10 serrîya ke bê sîgorta xebitêyena destpêkê qiseykerdişê xo de wina va: “10 serrî ez keyeyêk de xebitîyaya û heme karê keyeyî mi kerde. Serra 2012î de ez nêweş kewta û nêweşî ver ez kar re ameya vetiş. Mi xebata xo ya 10 serran bi şahid û kamerayê sîteyî mehkema de îspat kerde. Labelê dima ra ame îdîakerdiş ke 10 serrî nê 4 serrî ez xebîtîyaya. Ez çend serrîya ke têkoşînê huqûqî dana.”

 

‘Karêke zehmet o’

 

Aytene tewr peynî wina va: “Ez 43 serrîya xo de xebitîyaya. Mi qet pere qezenc nêkerde. Mi emrê xo ver fabrîka û sewbîna cayan de kar nêdî. No semed ra mi qerar da ke ez keyeyan de bixebita û dima ra zî mi no keye de dest bi kar kerde. Eke mecburî nêbayenê mi karêko winasî nêkerdêne. Karê mi xeylê zehmetin o. Ganî pakîya heme cayan bêro kerdiş û werd bêro viraştiş û utî bêro kerdiş. Wexto ke ez yena keye na reye ez karê keye kena. Serê sibayî re heta şewe ez xebitîyena, labelê keda mi nîna dîyiş.”