STENBOL - Wezîrê Perwerdeyî Îsmet Yilmazî derheqê vurnayîşê bicakerdişê lîseyan de îzahatê ‘wendekarî derbazbîyayîşê lîse de eşkenê mektebê ke wazenê tercîh bikerê’ dabi. Sereka 3in Şubeyê Egîtîm Senî Ayfer Koçake derheqê babete de qisey kerde û va: "Kagithane ke 440 hezar nifûsê ci esto, tena di mektebê lîseyê anadolu estê. Do ê lîseyan de kam ci wendekar bêrê bicakerdiş. Do ê wendekarî ça de şêrê?"

 

Tirkîya ke 6 aşman ra reyke sîstemê perwerdeyî yeno vurnayîş, en peynî TEOGî de amebi kerdiş. Wezîrê Perwerdeyî Îsmet Yilmazî dîyar kerd ke vera TEOGî ‘Sîstemê bicakerdişê mahalî, ya zî yê ke wazenê bi sîstemê îmtîhanî' ardê. Îsmetî hîn maddeyê derheqê vurnayîşî de eşkera kerd û va wendakarî mektebê ke wazenê eşkenê tercîh bikerê. Sereka 3in Şubeyê Egîtîm Senî yê Stenbolî Ayfer Koçake derheqê babete de qisey kerde û vatişê "Domanê ti kesî mektebê ke nêwazê do nêşêrê" ard vîr û qiseykerdişê wina domnaye: "Şansê înan nêşîyayîşê çin o. Semedo ke hûmara mekteban de vurnayîşê cidî ameyî cuyayîş."

 

Ayfera ke mintiqaya Kagithane de berpirsîyar bî û derheqê mekteban de cigêrayîş kerdo, va çepê vatişê îfadeyê Îsmetî ra, înan xo resnayo dayeyê cîya. Ayfere wina va: "Kagithane de goreyê dayeyê 2016an de 440 hezar kes cuyenê. Nika na hûmare zêde bîya. Hûmara mektebê lîseya Anadolu zî di yê. 7 lîseyê îmam hatîp estê. 4 hebî lîseyê îmam hatîp yê domanê kêneyan 7 zî lîseyê meslegî yê. Mektebêke perwerdeyê çiraxan dana zî esta. Hemverê no tablo de şîyayîşê wendekaran ê lîseyê anadoluyî zaf kêmî yo."

 

'Goreyê waştişî nêbi goreyê puanî bi'

 

Ayfere wextê TEOGî zî nimûne da û va: "Wextê ke wendakarî goreyê puanî ameyne bicakerdiş, her kes zano goreyê waştişî nêşîne mekteban. Semedo ke TEOG de goreyê puan ameyne bicakerdiş. Wexto ke puan nêgirewtêne keyeyan domanan eşrawitêne mektebê meslegan, îmam hatîp ya zî yê ê taybet.”

 

'Do ê wendekarî ça de şêrê?'

 

Ayfere ard ziwan ke gelo do no halî de lîseyê anadoluyê Kagithane qîm bikero û va: “Wezîr vano, do wendekarî şêrê mektebê ke wazenê. La do nê wendekaran bieşrawê kam ca? Do mektebê neweyan viraznê? Mektebê newe zî hema winî nînê viraştiş.

 

Ayfere da zanayîş ke derheqê vurnayîşê sîstemê perwerdeyî de wezîfeyêke pîl kono ser ê keyeyan û va komel zî en tay bi qasê keyeyan no halî ra berpirsîyar ê.