Safîye Algaş 

 

AMED -  Tirkîya de her ke şona hûmara îstîsmar, îxlalê heqan, tewqîfkerdiş, îxraçkerdiş û sewbîna xeylê neheqîyî zêde bena. Îstîsmarbîyayişê domanan de zî zêdebîyayiş yeno dîyîş. Ganî domanê ke raştê îstîsmarî yenê, bin kontrolê psîkologan de bêrî taqîpkerdiş. Avûkat Gazal Kolumane derheqê astengkerdiş û tedbîrê ke bêrî girewtiş de qisey kerde û çareserîyan hûmarte.

 

Gazale destpêkê qiseykerdişê xo de bale ante problemanê Tirkîya ser û wina va: “Tirkîya de na babet de  û hetê perwerdeyî de problemê girdan cuyena. Kesê ke domanan reyde kewenê temasî, ganî bêrî perwerdekerdiş û wayirê fehm bibî. Wexto ke pî û dayik domananê xo erşawenê cayan, ganî wezîfeyê ke bîarî ca estî. Welatanê ewropa de perwerde mektebê domanê şenikan de dest pêkeno. Ewja de CDyê ke mîyanê ci de ‘Merdim senî eşkeno bedenê domanan înan rê bido şinasnayiş’ dîyeno keyeyanê domanan. Modelê ewja de xebatê cidî estê.”

 

'Ganî doman bimusî çekuya ‘nê’

 

Gazale dewamê qiseykerdişê xo de va ‘ganî cayê taybet domanan re bêrî vatiş û înan re bêro vatiş ke wa kesêk destê xo nêdo ewja’ û wina qedênaye: “Ganî çekuyê baş, xirab, heskerdiş û nêbaş domanan re bêrî îzehkerdiş. Tirkîya de qanûnê ke mexdurê îstîsmarî bipawî çin î. Wexto ke doman raşrê îstîsmarî yenê girîyenê qanûnê mexduran, ya zî yê şahidan. Ganî doman hetê Mudirîya Polîtîkayê Sosyal û Keyeyan re bin çarçeweya psîkologan de bêrî taqîpkerdiş.”