Fîlîz Zeyrek

 

EDENE - Cinîyan dîyar kerd ke ‘Wa Erdogan bêro, poşetanê ma yê dayîş û girewtişî biewnîyo' û hemverê dayeyê pîlbîyayîşê TUÎKî reaksîyon mojnayî ra. Cinîyan ard ziwan ke ‘Ma qij bîyê, ê bîyê pîl' û hewl danê fêkî û sebzeyê en erjan bigîrê.

 

Goreyê dayeyê TUÎKî ekonomîya Tirkîya ke aşmê Temmuze-Tebax- Êlule de nîmeyê hîrên de sera 11.1 girs bîyo. Gelo pîlbîyayîş çiqas bandure ser ê hemwelatîyan de kerdo. Hemwelatîyê bazarê taxa Hurriyetî ê Seyhanî yê Edenî dayîş û girewtişî kenê derheqê pîlbîyayîşè Tirkîya de qisey kerdî.

 

'Wa Erdogan bêro poşetanê ma ra biewno'

 

Gule Demîre da zanayîş ke ekonomî her serre ke şina hîna qij bena û wina va: "Wa Erdogan bêro poşetê ma yê bazarî ra biewno. Wa bivîno gelo qij bîyê ya zî bîyê pîl. Ez bi 100 TL yena bazarê hewtane û dayîş û girewtiş kena. La no pere qîm nêkeno. Heme çî vayo. Hêzê ma çin o ma bigîrê. Meaşê ma xeylê kêmî yo. Serre 3 rey zam yeno. La semedê meaşan zan nêkenê. Pereyê asgarî 1.400 TL yo. Do qîmê kamî bikero?"

 

'Wa bêrê halê ma bivînê'

 

Alîye Uslu zî da zanayîş ke serra vîyarte de kîlo firingî eşkaya bigîro la emsar ancax eşkena kîloyêke bigîro û qiseykerdişê xo wina dewam kerde: "No şar vêşan o. Wa bêrê halê ma bivînê. Ê ser kursîyê xo de nişnenê ro, ma rezîl bîyê. Gerek en kêm pereyê asgarî 3.000 TL bo. Bi no hawa ma eşkenê domananê xo mird bikerê."

 

Ayşegul Aladaş zî dîyar kerd ke aye her wext raya xo dana AKPî la Erdoganî ra razî nîya û semedo ke debara aye nêbena û bi 15 serrî yo krîz dewam keno.