Rûken Goman 

 

DÊRIK – Hemsereka Meclisê Awankerdişê Sîstemê Federalîya Demokratîke Hedîye Yusife qala proje û qezencanê serra 2017î kerd û wina va: “Hedîseyê ke 2017î de qewimîyayî rewşek newe û sîstemê cuya seyyewbînannî awan kerdî”

 

Serra 2017î serrêka dekerde û zehmetin bî. Badê xeylê dej û hedîseyan ma nê rojan de kewene serrêka newe. Serra newe de yeno omidkerdiş ke serra 2018î biba serra aştî û azadîya Rojhelato Mîyanen. Nika ra pîrozkerdişê serra newe dest pêkerdî. Hemsereka Meclisê Awankerdişê Sîstemê Federalîya Demokratîke Hedîye Yusife qala serkewtiş û qezencanê serra 2017î kerde û serra newe yê heme kesan nika ra pîroz kerde.

 

Hedîye destpêkê qiseykerdişê xo de bale ante şerê Sûrîye, qezen û serkewtişanê 2017î ser û wina va: “Vakurê Sûriye de seba şaran heme hêzê pawitişî duştê terorî de têkoşînêko pîl da. Cok ra tewr zêde rizgarkerdişê Minbic, Tebqa, Reqa û Dêra Zorê veng dayî. Kantonên Vakurê Surîye badê rizgarî sîstemê xo awan kerdî û kerdî dewre. Hêzê Surîyeya Demokratîke (HSD) xeylê herêman rizgar kerd. Çeteyê DAIŞî şarî ser de koçkerdiş, qetilkerdiş û talankerdişî ferz kerdî. Labelê xoverdayişê HSDyî çeteyan çin kerd û xeylê bedilnayişan awan kerd. Hêzê Koalîstonê Mîyanneteweyî piştîya çekan dayî HSDyî û Reqqa ame rizgarkerdiş. Çeteyê bi xeyalê awankerdişê ‘Dewleta Îslamî’ têk şîyî û heme kesan tehdit kerdî.”

 

'Şoriş yewîya şaran awan kerd'

 

Hedîye dewamê qiseykerdişê xo de wina va: “Rizgarkerdişê Reqqayî hetê dengeyanê sîyasî de xeylê muhîm bî û tesîrê xo da sîyasetî ser. Şarê ma zî bi rêxistinbîyayişê xo qezencan bi dest kerd. Şorişê Rojawanê Kurdistanî yewîya şaran awan kerd. Badê serkewtişan Projeyê Federalîya Vakurê Surîye ame îlankerdiş. No proje de azadîya heme şaran esta. Ma Vakurê Surîye de goreyê qanunê Meclisê Awankerdişî gama weçînayişan eşt. Gama diyin yê projeyî zî rêxistinkerdişê bajar, qeza û kantonan bî. Şarê ma bi îradeya xo ya azade şî sendoqan ser."

 

'Serra azadîya heme cinîyan'

 

Hedîye tewr peyên wina va: “Na rewşe serkewtişêko sîyasî ya. Xeylê kesî mîyanê nê şert û mercan de hende serkewtiş û qezencan bawer nêkerdêne. Labelê weçînayiş bi hawayo demokratîke virazîya. Weçînayiş de netîceyê xurt vejîyayî raşte. No weçînayiş zemînê ameyoxa Surîyeya demokratîk o. Projeyê ma yê yewin yê 2018î, agêrayişê şaran o. Serra 2018î do biba serra çareserî û azadîya heme cinîyan. Ma nika ra serra newe ya heme kesan pîroz kenê.”