Hîkmet Tunç

 

WAN –Ame zanayiş ke Şehrîban Dînçe ke hetê Esat Dînçî ra ameybî qetilkerdiş, qetilbîyayişê xo ra 3 aşmî verê cu waştişname erşawita Buroya Piştîdayişê Edlî yê Serekatîya Baroya Wanî. Waştişnameyo ke bi destê Şehrîbane ameyo nuştiş de wina yeno vatiş: “Keremê xo ra qetilbîyayişê sewbîna cinîyêk re ver piştî bidêne mi.”

 

Ame zanayiş ke Şehrîban Dînçe 3 aşmî qetilbîyayişê xo ra ver 30ê êlula 2016î de Buroya Piştîdayişê Edlî yê Serekatîya Baroya Wanî re waştişname nuşt a û seba ke nêra qetilkerdiş înan re piştî waşta. Mehkemeya fehmê camêrdî qêrayişê Şehrîbane nêeşnawite û qetilbîyayişê aye temaşe kerde.

 

 ‘Mi 7 serrî şîddet dî’

 

Şehrîbane waştişnameyê xo de dîyar kerda ke hetê Esat Dînçî re raştê şîddeto sîstematîk ameya û wina nuşt a: “7 serrîyo ke ez zewecnayêya. Mîyanê nê 7 serrî de şîddet û îşkence bi mi amey kerdiş. Her reye derheqê Esatî de cezaya dûrîvistişî yena dayiş. Labelê ceza bi nîno kerdiş. Her wext şîddet û tehditê  Esatî estî. Esatî domanê mi bi kardî tehdit keno. Psîkolojîyê ma têk şîyo. Domanê mi perîşan bîyî. Piştî bidêne mi. No kes bi desan reye mi û domananê mi ver de madeyê tiryakî xebitna. Labelê xebitnayişê tîryakî înkar kerd û va zure ya. Mi hetê merdim û domanê mi xirab keno û tehdit keno. No kes mi re vano ‘eke ti mi verdî, ez do bê xebera to fotografê to biancî bida mudirî.’ No kes pere, zerd, telefon û pereyê domananê mi yê ke kombara de bî dizna.”

 

 30.09.2016… Şehrîban Dînç…

 

Şehrîbane waştişnameyê xo de daya zanayiş ke prosesê fekveradayişî de piştî waşta û wina qedênaya: “Esat nika mi tehdît keno û vano ‘eke ti mi verada ez do to û domananê to bikişa.’ Ez avûkat wazena. No ke wa mi û domananê mi ra bêro dûrî kerdiş. Çimkî do zirar bido mi û domananê mi. Kesêko tehlukeyin o. Keremê xo ra qetilbîyayişê sewbîna cinîyêk re ver piştî bidêne mi. 30.09.2016 Şehrîban Dînç."