'Keyeyê ke nêzanê domanê înan kam hepisxane de yê'

  • 11:44 15 Kanûne 2017
  • NAROJANE
Berîtan Canozer
 
STENBOL - Hemsereka Însiyatîfê Piştdayîşê bi hepisxanan dir Sureyya Aydine bale ant ser tedayê hepisxaneyan de bîyê zêde û tecrîdê ser Rayberê PKKî Abdullah Ocalanî û wina va: “Keyeyê ke bi aşman domananê xo ra xebere nêgînê estê, nêzanê kam hepisxane de yê. Ganî şarê Kurd wayîrê erjê xo vejîyê."
 
Binpêkerdişê heqan hepisxaneyê Tirkîya û Kurdistanî dewam kenê. OHAL kenê sebeb û şert û mercê cuyayîşê hepsîyan yeno tengkerdiş û cezayê pêvînayîş û xebergirewtişê teberî ra yenê îzolekerdiş. Hepsîyê cinî yê hepisxaneyê Elezîzî hemverê nê caardişan kewtî grevê vêşanî û grev kewt roja 45ine. Hemsereka Însiyatîfê Piştdayîşê bi hepisxanan dir Sureyya Aydin, polîtîkayê ke hepisxanan de virazênê rexne kerde.
 
'Hepsî xo ver danê'
 
Sureyya ard ziwan ke wext, wextê qiseykerdişî nîyo û wina va: "Sere de hepisxaneyê Elezîzî û xeylê hepisxaneyê bîn de hepsî rastê îşkence û tacîzî yenê. Koxuşan de kamera yenê bicakerdiş, mardiş ser ê lingan de yeno kerdiş, cezaya hucre yeno dayîş, pêvînayîş yenê astengkerdiş, faşîzmê 12ê Êlule hepsîyan rê yeno ferzkerdiş. Hepsîyan bedenê xo dayo verê vêşanî û hemverê şertê xidar xo ver danê."
 
Sureyya va ke keyeyê ke şinê hepisxane dîyar kerdî ke ferzkerdişê ‘Kurdî nê, Tirkî qisey bikerê' yeno kerdiş û va sebebê yewin zî bi tecrîdê Rayberê PKKî Abdullah Ocalanî eleqedar bê.
 
'Tecrîd bandure ser ê heme prosesan kerd'
 
Sureyya dewamê qiseykerdişê xo de nê çî ardî ziwan: "Tecrîdê ser Abdullah Ocalanî bandure sere de hepsîyan, ser ê heme waran de kerdo. Tecrîd bandure ser heme hedîse û prosesê welatî keno. La en zaf ser ê hepsîyan keno. Hepisxaneyê vuryayê cayê îşkencexaneyan. Her roje merdimêke hepsîyan yenê û vanê hepisxana de ameyê derbkerdiş. Bi aşman o keyeyê ke domananê xo ra xebere nêgirewtê estê. Ganî şarê Kurd wayîrê erjê xo vejîyê. Hepsî zî yew erjê ma yê. Gerek ma semedê hepsîyan bikoy tevger.”
 
Sureyya peynî de wina va: “Ma sey însiyatîf hewl danê xo biresê hepsî û merdimanê înan. Eşkenê zanayîş bidê ma. Problemê pîl estê û eşkenê orte ra wedarnê. Gerek ma bibê vengê hepsîyan."