Duygu Cînîvîz

 

 AMED –Gimgimê Muşî de 10ê tebaxa 2015î de pêrodayiş virazîyabî û netîceyê hedîseyî de endama YJA Starî Ekîn Wane (Kevser Elturk) cuya xo vînî kerdbî. Badê mergî bedenê Ekîn Wane amey teşhîrkerdiş û fotografê ke aîdê bedenê aye bî çapemenîye de ameyî serwîskerdiş. Qewimîyayişê hedîse ra dima, 2 serrî ver cigêrayiş dîya dest pêkerdiş, labelê dest pêkerdişê doze ra heta nika qet averşiyayiş nêvirazîyayo.

 

Gimgimê Muşî de 10ê tebaxa 2015î de pêrodayiş virazîyabî û netîceyê endama YJA Starî Ekîn Wane (Kevser Elturk) cuya xo vînî kerdbî. Bedenê Ekîn Wane amey teşhîrkerdiş û fotografê bedenê aye çapemenîya komelkî de ameyî serwîskerdiş. Badê no hedîseyî cigêrayiş dîya dest pêkerdiş û 2 serrî yo ke doze dewam kena. Mîyanê 2 serrî de doze de qet averşîyayiş nêvirazîyaya. Rêxistinê cinîyan dîyar kerdî ke îşkenceyo ke bedenê Ekîn Wane ameyo kerdiş, îdeolojîk o. Vînayişê hedîse sey hêrişê zîhnîyetê camêrd û dewlete ame dîyiş û ame vatiş ke herişo ke bedenê Ekîn Wane  ser de ameyo kerdiş, yeno manaya hêrişkerdişê nasnameya heme cinîyan. Hedîseyê teşhîrkerdişê bedenê Ekîn Wane bî sebebê reaksîyonan.

 

Walîtî xeberê hedîse da eşnawitiş

 

Badê reaksîyonê rêxistinê cinîyan, Walîtîya Muşî 16ê tebaxe de înternet ser o îzehetêko nuştekî weşêna û îzehetê xo de dîyar kerdibî ke raştîya fotografî ameyo tespîtkerdiş û derheqê kesê ke fotografî antî de cigêrayiş ameyo dest pêkerdiş. Îzehetê walî ra zî 2 serrî vîyart, labelê heta nika çîyê daxî nêameyo kerdiş.

 

TCKî vano do bêrî cezakerdiş la… 

 

Netîceyê wekaletê birayê Ekîne, Abdullah Elturkî de 17ê tebaxa 2015î de avûkat Ayla Akat Ata, Gulşen Ozbek, Cuneyt Canîş, Kadîr Karaçelîk û Tarik Guneşî muracatê Dozgerîya Muşî kerdî. Muracatê sucî de yeno vatiş ke goreyê 130. Qanûna Cezaya Tirkî no sucî re 3 aşmî ra heta 2 serrî ceza yeno waştiş. Heto bîn de muracat de muhakemekerdişê kerdoxan ameybî waştiş û goreyê şahidan cenaze erd de ameya antiş û îşkence bi cenaze ameyo kerdiş.

 

Avûkat Gulşen Ozbeke derheqê rewşe de zanayişan pare kerde û wina va: “Sey ke yeno zanayiş şikê înfazkerdişê Ekîne esta. Bedenê aye amey teşhîrkerdiş. Seba ke rewşe bêra muhakemekerdiş, ma muracatê Dozgerîya Muşî kerd û zelal kerdişê rewşe taleb kerd. Ganî sere de heme kesê ke beşdarê operasyon bîyî bêrî tespitkerdiş û dima ra kerdoxî bêrî tespitkerdiş. Hedse ra ser 2 serrî vîyart, labelê heta nika ti gamêk nêameyo eştiş. Ma rewşe re bi şikin î. Wina asîyeno ke padayişê hedîse yeno waştiş.”