Rojda Aydin

 

AMED- Aktîvîsta Meclîsê Ekolojîyê Amedî û Endama Platformê Pawitişê Hewselî Çîlem Aydıne derheqê qerarê ke semedê Çemê Dîcle û Baxçeyê Hewselî ameyo dayîş de qisey kerde. Çîleme va ke ganî kesêk zî hemverê nê çinkerdişî de bêveng nêmano û çinkerdişî rê vajê 'Nê' û ard ziwan ke ê do zî xebatê xo binê nameyê 'Dest mede Hewselî' de dewam bikerê.

 

Dorpêç û qedexeyê Sûrî ke bi di serrî ame destpêkerdiş dewam keno, verê ey de rijnayîşê xeylê taxan ke ame destpêkerdiş zî hîna dewam keno. Îqtîdar dimayê qerarê îstîmlakkerdişê lezgîn ê semedê Sûrî girewt, semedê Çemê Dîcle û Baxçeyê Hewselî zî qerarêke bi no rengî girewt û Baxçeyê Hewselî û Çemê Dîcle sey ‘Warê Projeyê Taybet’ ame îlankerdiş. Platformê Pawitişê Hewaselî hemverê çinkerdişê Çemê Dîcle û Baxçeyê Hewselî no hewte reyke çalakîya geyrî virazno. Aktîvîsta Meclîsê Ekolojîyê Amedî û Endama Platformê Pawitişê Hewaselî Çîlem Aydine va ke ganî kesêke hemverê çinkerdişî bêveng nêmanê û nê çinkerdişî rê vajê ‘NÊ’. Çîleme dîyar kerde ke ê do binê nameyê ‘Dest mede Hewselî’ de xebatê xo dewam bikerê.

 

Çîleme va ke wexto ke derg o, sîstemê kapîtalîzmî ser Çemê Dîcle û Baxçeyê Hewselî de plan viraşto û nê planan ra yew ci ra o yo ke wazenê Baxçeyê Hewselî çin bikerê û wina va: "Platformê Pawitişê Hewselî do destûr nêdê ke warê betonan viraznê. No semed ra zî ma do hemverê nê çinkerdişan çalakîyan viraznê. Nê çalakîyan yew zî ma do Baxçeyê Hewselî de her hewte reyke viraznê. Sebebê çalakîyanê ma semedo ke Hewsel çin nêbo û warê beton nêrê awankerdiş o. No semed ra teber de xeylê rêxistinê sîvîl yê komelî û takekesî dir piştdayîşê yewbînan kenê û pîya xebatan kenê. Wextê na xebate de ma nê çî ferq kerd; xeylê kesî hema Hewsel nas nêkenê û mîyanê Hewselî ra qet derbaz nêbîyê. No semed ra zî ma waşt ke vernê de merdimî uca ra biewnê, semedê çi ma vanê tîya nêro çinkerdiş."

 

'Hewsel ameyoxê ma yo'

 

Çîleme dewamê qalîkerdişê xo de va, dimayê ke Hewsel de gernayîş yeno kerdiş heme kes mat manenê û vanê ke nêzanayê Amed de cayêke winî esto û qiseykerdişê xo wina dewam kerde: "Dimayê nê vatişan hîna zêde wayîrê Hewselî vejênê. No zî semedê ma zaf girîng bi. No semed ra ma do çalakîyê xo yê gernayîşî dewam bikerê. Semedo ke Hewsel tena semedê ma nê, semedê doman û tornê ma zî girîng o. Hewsel ameyoxê ma yo. Wexto ke ma geyrê Hewselî kenê, derheqê Hewselî de û giringîyê Hewselî de zî ma qisey kenê. Tîya bi seyan tewir vaş û xeylê heywanî estê. Eke tîya awanîyê beton bêrê viraştiş tena warê cuyayîşê merdiman nê eynî wextî de do heywan û tewir ê vaşan zî bêrê çinkerdiş."

 

'Çinkerdişî rê vajê 'NÊ'

 

Çîleme dewamê qiseykerdişê xo de ard ziwan ke sewzeyê Amedî ke yenê peydakerdiş heme Hewsel ra yenê ramitiş û wina va: Eke bêro çinkerdiş do warê ramitişî zî bêrê çinkerdiş. Şarê Amedî sewzeyê ke tîya ra berardiş kenê do mecbûr bimanê ke Edene ra bigîrê. No semed ra zî ganî şar vernê de hemverê nê çî vejîyo. Planê înan de çinkerdişê pêroyî de esto. No semed ra zî heme şar hemverê çinkerdişê pêroyî veng vejê û vajê ‘NÊ’ û ma zî binê nameyê ‘Dest mede Hewselî’ de têkoşînê xo dewam bikerê. Do xebatê ma her wext dewam bikerê. Projeyê ke ser Hewselî ameyî kerdiş peynî bibê zî do xebatê ma dewam bikerê."

 

'Hewsel semedê Amedî boy û oksîjen o'

 

Çîleme peynîye qiseykerdişê xo de va ke kesê Amed de cuyenê ganî wayîrê Hewselî vejyê û wina va: "Hewsel semedê Amedî boy û oksîjen o. Ma tena xo rê nê, ma gerek ganeyê ke uca cuyenê înan rê rêzdar bê. Çinkerdişê sewzî û heywanan, çinkerdişê merdimayî yo."