Fîlîz Zeyrek

 

EDENE - 16ê Teşrîna peyêne Dortyolê Hatayî de qezaya trafîkî amebî meydan, di karkeran cuya xo vinî kerdî, xeylê xo ci ra cinî 26 karker birîndar bibî. Cinîyê karkerê ramitişî ê ke birîndar bî vatî: ûbûn. “Yê ke mirenê ma yê, yê ke keda înan yena pelçiqnayîş zî ma yê."

 

16ê Teşrîna peyêne de Dortyolê Hatayî de mînîbusa ke karkerê ramitişî berdêne qeza kerd û Abdullah Dogano 63 serre û cinîya ey Sarya Dogana 64 serrî cuya xo vinî kerdibî. Xeylê ci ra cinî 26 karkerî zî birîndar bîbî.

 

'Ma merdiş ra xelisîyayî'

 

Husna Biçakçiya karkera ramitişî yê 15 serran, qeza de pişt, sereyê xo û çimê xo ra birîndar bî û va: “Ma merg ra xelisyayî. Roja ke qeza virazya, ma ser ê siba saete 03.00 de wiştî û ma siwarê mînîbuse bî. Hûmara karkeran nêzdîyê 32 heban bî. Ma resay Dortyolê Hatayî û reyke de ma qelibyayî. Wexto ke mi çimê xo akerd, her cayê mi dejayne. Her kes birîndar bibi. Dîmenêke bi xof estbi."

 

Husna da zanayîş ke 1990 de Kurdistan ra koçê Çukurova kerdî û wina va: "Ma ser ê herra ma ra koçber kerdî. Dewe, keye û çî ma ameyî veşnayîş. Her roje eştê ser ê dewa ma. En peynî wexto ke keyeyê ma ame veşnayîş, ma koç kerd. Nika zî ma bîyê koleyê axan. Ser ê pişta ma de pereyan qezenc kenê û yevmiyeyê ma nêdanê. 15 saetan ma xebityenê la heqê kede ma nêdanê."

 

'Korseyê pişta xo zî ma girewt'

 

Sebîha Şenlîkdare ke qeza de pişte xo ra birîndar bî, da zanayîş ke semedo ke domananê xo bido wendiş, karkerîyê ramitîşî kena û va: "Pêwa ke kar zehmet bî, ma mecbur mendî bixebitîyê. Ma saetê siba 3 de wirzenê we û mi domanê xo verdayne û ez şîne. Pişta mi şikya. Sîgorteya mi çinbi. Ez bi qertê kesk î derman bîya la o zî fêde nêkerd. Ma korsayê xo zî bi pereyê xo girewt. No halî de ma 50 TL pereyê dermanan danê."

 

'Cuyayîşê ma hende erjan o'

 

Fatma Çelîke zî qeza de çeng û sereyê xo birîndar bîya û va: "Ma cuyayîşê ma hende erjan o. En zêde cinî mexdûr benê. Ma hem keye de hem zî kar de xebityenê. Ma bi çend saete hewn ra wirzenê û xebityenê. Yê mirenê zî ma yê, yê ke pelçiqênê zî ma yê."