AMED - Qayûmo ke tayînê şaredarîya Amedî bî, qezaya Sûrî de bi mehneya xebate xeylê kuçeyan de bi desan çale da kinitiş. Hemwelatîyê taxe dîyar kerdî ke şaredarî hizmet nêkena û eke çale nêrî padayiş, beno ke domanî bikewî nê çalan

 

Qezaya Sûrî ya Amedî de polîtîkayê rijnayişî dewam kenê. Badê ke Qanûnê Hukmê Qanûnî (KHK) ameyî vetiş, xeylê şaredarîyan re qayûmî ameyî eştiş. Nê şaredarîyan ra yew zî şaredarîya qezaya Sûrî ya Amedî ya. Ameyişê qayûmî ra dima hema hema heme tax û kuçeyanê Sûrî de qereqol û nuqtayê polîsan ameyî viraştiş. Qayûm awe û cereyanê taxe birna û şar ser de koçkerdişî ferz kerd. Rojê peyênan de zî tax û kuçeyan de bi mehneya xebata binzemînî bi desan çale ameyî akerdiş û kinitiş dewam kena. Hemwelatîyê taxe reaksîyon nawitî na rewşe nêrazîbîyayişê xo ardî ziwan ser.

 

Taxa Îskenderpaşa, Zîya Gokalp û Camîya Nevî de xebata binzemînî yena kerdiş. Xebata kinitişe bî yew aşme ke dest pêkerda û şar kinitişê çalan ver tersê kewtiş û mergî cuyeno. Hemwelatîyê taxe dîyar kerdî ke yew aşmek de bi desan taxan de çale ameyî kinitiş û dima ra zî çale akerde ameyî veradayiş.

 

Ma ters reyde cuyenê

 

Hemwelatîyî qiseykerdişê xo de wina vatî: “Çalan ver ma nêeşkenê taxe ra bivîyarî. Ma ters reyde cuyenê. Beno ke ma bikewî çale. Wexto ke kinitiş newe dîya dest pêkerdiş, ma ra ame vatiş ke do xebate do tena hewteyek dewam bikera. Labelê yew aşma ke çale sey xo yî û yê ke ameyî akerdiş zî nînê padayiş. Ma tersan ver şewe nêewtanenê bivejîyî teber.”

 

Beno ke doman bikewî çalan

 

Hemwelatîyanê taxe ra Ayşe Çatale qiseykerdişê xo de wina va: “Yew aşma ke taxe yenê kinitiş. Ma her roj şaredarî gêrenê û înan re vanê bêrên nê çalana padên. Labelê ma re çîyek nîna vatiş. Eke doman bikewê nê çalan do kam hesab bido? Zimistan o û heme kerrayê taxe ameyî wedarnayiş. Eke varan bivaro do taxe biba çamir. Taxe de tehluke estî.”

 

Aşma verên de domanêko 4 serrî kewt bî çala ke şaredarîya Şirnexe kinitbî û doman cuya xo vînî kerd bî.