MÊRDÎN - Nisêbîn de dimayê pêrodayîşan taxa Zeynel Abîdînî amî wêrankerdiş, nika zî bi sebebê  tunelî yena parçekerdiş. Hemwelatîyê taxe dîyar kerdî ke sebebê vînayîşê tunelî, taxa înan reyna yena texrîbkerdiş û vatî no tunel bi serran o hetê kaçaxwanan ra yeno xebitnayîş.

 

Qezaya Nisêbînî yê Mêrdînî 14ê Adara 2016 de bi îlankerdişê qedexeyê tebervejyayîşê kuçeyan taxa Zeynel Abîdînî amîbî serûbinkerdiş û nika zî bi sebebê vînayîşê tunelî rastê eynî caardişan yena. Pêwa ser ê pêrodayîşan de serrêke derbaz bîyo zî, xeberê sey 'Nisêbîn de tunelo ke şino Sûrîye ameyo vînayîş' ame serwîskerdiş. Nîno zanayîş ke do aqûbetê taxe se bibo.

 

Şaredarî ra xizmeto sifir

 

Pêwa ke ser ê pêrodayîşan de hende wext derbaz bîyo zî, taxa Zeynel Abîdîn de hîna ti xebat nêameyo kerdiş. Taxe bi nêzdîyê xo sînor yena şinasnayîş. Yeno vatiş ke do 'ya bibo park ya zî bargehê leşkerî’. Keyeyê ke keyeyê înan ameyê rijnayîş zî bi hewldayîşê xo tamîr kerdî. Qeyûmî ti xizmet şarî rê nêkeno. Nîno zanayîş ke halê şarî ra xebera ci esto yan nê.

 

Hemwelatîyê taxe dîyar kerdî ke her wext awe û ceyranê înan yeno birnayîş û koçberî înan rê ferz kenê.

 

'Tunel ê kaçaxwanan o'

 

Demê peyînan de xeberê sey ‘tunelo ke şino Sûrîye ame vînayîş' vejênê. Tunelo ke yeno zanayîş aîdê esnafî hacetê kaçaxî anê yê. Semedê raya pêroyî sey zanayîşê ‘tunelo aîdê PKKyijan ame vînayîş' yeno serwîskerdiş. La her kes zano ke no tunel aîdê esnafê ke hacetê kaçaxî anê yo.

 

Dimayê xeberê winî bi polîs û wesayîtê zirxî kendayîş da destpêkerdiş. Nêzdîyê keyeyê ke keyeyî manenê, no hewteyêke yo kendayîş yeno kerdiş. Bi sebebê ke ‘ma tunel geyrenê' her ke şino kendayîş dewam keno.