Gulîstan Azak

 

MELETÎ - Keyeyê tarîxî yê aîdê Ermenîyan û koşke Boztepeyî bi tehlukeyê çinbîyayîşî dir rî bi rî mendê. Hemwelatî semedê îhtîmalê rijnayîşê koşke bi endîşeyîn ê û vatî: "Qey heta ser ê merdiman de nêrijîyo, tedbîr nîno girewtiş?"

 

Meletî de konaxê aîdê Ermenîyan verê çinbîyayîşî de yê. Koşka Boztepe taxa Goztepeyî zî tay mendo birêjîyo û keyeyê tarîxî zî semedê şewato ke vejyayo bi xesar ê. Hemwelatî hemverê halê nê keyeyan reaksîyon mojnayî ra.

 

'Ganî bi lezgînî bêrê restorekerdiş'

 

Melek Korkmaza  45 serrî dîyar kerde ke ganî semedê restorekerdişê Koşka Boztepeyî tarîxî heme sazgehî bikoyê mîyanê tevgerî û wexto ke nê keyeyî nêrê restorekerdiş de birijyê. No semed ra vengdayîşê tedbîrê lezgîn kerdî.

 

Meleke da zanayîş ke awanî tay mendê bikoyê û wina va: "Tay mendo awanî bikoy. La ti tedbîr nîno girewtiş. Her roje kuçeyan de bi desan kesî derbaz benê. Gelo heta ser ê yewî de nêkoy, do tedbîr nêro girewtiş. Eke ser ê hîn kesan de biko do berpirsîyar kam bo?"

 

'Ti tedbîr nînê girewtiş'

 

Zehra Çelîka (60) zî ard ziwan ke koşke kuçeyê en qelebalix ê Meletî de ca gêna û wina va: "Koşke no halî de verdayê û no zî hemverê şarî rêzdarî yê. Qaşo şaredarî bi asinan dorê koşke barîyer viraşto. Ma fam nêkenê no barîyer feydeyê ci çîyo. kêrî çi tê. Sîwanê koşke do ser ê ma de bêro warî. Barîyer berdê verê bera. Gelo do ma bieşko bipawo?"

 

Şems Sonmeza 19 serrî zî dîyar kerde ke koşke açeryaya sergo û va heybetê tarîxî yê koşke çin bîyo.