ENQERE - Fezlekeya bi îdiayê ‘Qijvistişê hukmatî ê komara Tirkan’ derheqê parlamenterê HDPî yê Êlihî Ayşe Acar Başaran de ameya amadekerdiş, resa meclîse. Derheqê Ayşe de heta nika bi temamî 35 fezleke ameyê amadekerdiş. Ayşe dîyar kerde ke fezleke yenê manaya ‘mekoyê mîyanê şarî, qisey mekerê, muxalefet mekerê.'

 

Serdozgerîya Komara ê Enqerî derheqê 19 parlamenterê HDPî de fezleke amade kerd. Sebebê fezlekeyan a ya ke 19 parlamenterî,  2ê Gulana 2016 de pêvînayîşê ‘wedartişê destnêdayîşan de' meclîse de slogan berzkerdiş û protestokerdişî ya. Yew zî parlamenteran ra derheqê înan de fezleke ameya amadekerdiş parlamentera HDPî yê Êlihî Ayşe Acar Başaran a. Sebebê fezleke a ya ke Ayşe pîrozbayîşê 21ê Adara 2017an de Newroze de qisey kerdo. Fezleke zî bi îdiaya ‘qijvistişê hukmatî komara Tirkîya û heqaret serekkomarî kerdiş’ ameyo amadekerdiş û yeno waştiş ke destnêdayîşê Ayşe bêro wedartiş.

 

Çarçewaya fezlekeyî de bi waştişê derheqê Ayşe de, goreyê 83in hûmara Desturê Bingehîn destnêdayîşî aye bêro wedartiş, fezlekeya ke ameya amadekerdiş resa meclîse.

 

Bi fezlekeya peynî û fezlekeyê derheqê Ayşe Acare de ameya amadekerdiş resa 35an.  Ayşe derheqê babete de da zanayîş ke hema hema heme qiseykerdişê aye ê bernameyan de ameyê şîrovekerdiş û vatişê aye bi muçinike ameyê weçînayîş û kerdê fezleke. Ayşe wina dewam kerde: "No yeno manaya 'mekoyê mîyanê şarî, qisey mekerê, muxalafet mekerê.' Ti manaya bîn ê fezlekeyan çin o."

 

Parlamenterê bîn ê derheqê înan de fezleke ameyê amadekerdiş wina yê: Dîlan Dîrayet Taşdemîr, Sîbel Yîgîtalp, Çaglar Demîrel, Huda Kaya, Adem Geverî, Mîthat Sancar, Ferhat Encu, Gulseren Yildirim, Îbrahîm Ayhan, Garo Paylan, Bedîa Ozgokçe Ertan, Meral Daniş Beştaş, Mahmut Togrul, Ertugrul Kurkçu, Mizgîn Irgat, Saadet Becerîklî, Nadîr Yildirim û Ziya Pîr.